प्रधानन्यायाधीश चोलेन्द्र शमशेर जबराको राजीनामा माग गर्दै कानून व्यवसायीले बिहीवार पनि विरोध प्रदर्शन गरेका छन् । 

बिहीवार सर्वोच्च अदालत बार परिसरमा नेपाल बार एशोसिएशन, सर्वोच्च अदालत बार एशोसिएशन, विशेष अदालत बार एशोसिएशन लगायतका पदाधिकारी तथा कानून व्यवसायीले प्रधानन्यायाधीश जबराको राजीनामा माग गर्दै विरोध प्रदर्शन गरेका हुन् ।

प्रदर्शनका क्रममा सञ्चारकर्मीसँग बोल्दै नेपाल बार एशोसिएशनका अध्यक्ष चण्डेश्वर श्रेष्ठले प्रधानन्यायाधीश जबराले राजीनामा नदिँदा न्याय सम्पादनका साथै कर्मचारीको वृत्ति विकासमा, न्यायाधीशको सरुवाका कामहरू रोकिएको बताए ।

उनले प्रधानन्यायाधीश जबराले राजीनामा दिएसँगै न्यायपालिकामा बारले बुझाएको प्रतिवेदनअनुसार काम गर्ने बाटो खुल्ने बताए ।

अध्यक्ष श्रेष्ठले भने, ‘न्यायपालिकाको सुधारको लागि प्रधानन्यायाधीश चोलेन्द्र शमशेर जबराको कारणले गर्दा न्यायपालिकाको न्याय सम्पादन, न्याय प्रशासनमा, न्याय आयोगबाट कर्मचारीको वृत्ति विकासमा, न्यायाधीशको सरुवाका कामहरू रोकिएका छन् । उहाँको राजीनामा नआएकोले सम्पूर्ण कामहरू ठप्प भइरहेकाले निकास दिनको लागि उहाँको बहिर्गमन आवश्यक छ । त्यो दिलाउनको लागि हामीले जुन आन्दोलन उठाएका थियौं, उहाँको राजीनामाको साथै जुन दिन उहाँले राजीनामा दिनुहुन्छ, त्यो दिनबाट न्यायपालिकाको सुधारका लागि हामीले जो प्रतिवद्धता गरिरहेका थियौं । त्यो प्रतिवेदन कार्यान्वयनका लागि बाटो खुल्छ । त्यो बाटो बन्द गर्नुभनेको सेवाग्राहीहरूलाई न्याय  नदिनको लागि न्याय किनबेच गराइराख्नको लागि रहेको हुन्छ । त्यो अवस्था बारले चाहँदैन ।’

विशेष अदालत बार एशोसिएनका अध्यक्ष तथा अधिवक्ता चुडामणि पौडेलले प्रधानन्यायाधीश जबराले राजीनामा नदिँदा केही जिल्लाहरुमा जबरालाई देखाएर आफ्नो स्वार्थपूर्ति गर्न थालेको बताए । उनले प्रधानन्यायाधीश जबराले राजीनामा नदिएसम्म नेपाल बारले आन्दोलनलाई सशक्त बनाउँदै जाने बताए ।