पृथ्वीमा मानिसलाई हमला गर्ने सबैभन्दा खतरनाक जीवमा लामखुट्टेको नाम पहिलो स्थानमा छ ।

यही एकमात्र जीव हो जसले सर्वाधिक मानिसलाई आफ्नो शिकार बनाइरहेको छ । 

लामखुट्टेले टोकेपछि अनेक प्रकारको रोग लागेर हरेक वर्ष १० लाखभन्दा बढी मानिसको मृत्यु भइरहेको छ । जानौँ यो जीवका बारेमा केही रोचक तथ्य ः 

–    संसारमा लगभग ३५ सय लामखुट्टेका प्रजाति पाइन्छन् ।

–    एउटा लामखुट्टेले आफ्नो वजनभन्दा तीन गुणा बढी रगत पिउन सक्छ । 

–    भाले लामखुट्टेले कहिल्यै पनि टोक्दैन । अण्डाको  विकास गर्न धेरै प्रोटिन चाहिने भएकाले पोथीले मात्रै टोक्छ । भालेचाहिँ रूखविरुवाको रस पिएर बाँच्छ ।

–    तुलसीको बोट छेउछाउमा लामखुट्टे कहिल्यै आउँदैन । किनभने उसलाई तुलसीको गन्ध मन पर्दैन । यो जीवले गर्भवती महिला तथा ‘ओ’ ब्लड ग्रुपका मानिसलाई अधिक मन पराउँछ । उनीहरूलाई खोजीखोजी टोक्छ ।

–    लामखुट्टेको दाँत हुँदैन । उसको तिखो र लामो चुच्चोले रगत चुस्छ ।

–    यदि तपाईंलाई पसिना धेरै आउँछ भने लामखुट्टेले धेरै टोक्छ । 

–    बियर धेरै खाने मानिसलाई पनि लामखुट्टेले अधिक मन पराउँछ । विभिन्न अध्ययनका अनुसार बियर नपिउनेभन्दा पिउनेलाई लामखुट्टेले धेरै टोकेको पाइएको छ ।

–    कुनै–कुनै लामखुट्टेका प्रजातिले मानिसलाई नटोकेर भ्यागुता, माउसुली आदिलाई टोक्छन् ।

–    जब तापमान बढ्छ लामखुट्टे पनि कम लाग्छन् । किनभने धेरै गर्मी यो जीवका लागि हानीकरण हुन्छ ।

–    यसले फैलाउने प्रमुख रोग मलेरिया हो । जसबाट हरेक वर्ष २५० मिलियनभन्दा बढी मानिस संक्रमित र लगभग १० लाखको मृत्यु भएको तथ्यांक छ ।

–    हाम्रो श्वासबाट निस्किएको कार्बनडाइअक्साइडको गन्ध थाहा पाएर लामखुट्टेले अँध्यारोमा पनि मानिसलाई खोजेर टोक्छ ।

–    पोथी लामखुट्टेले एक पटकमा करिब ३ सय अण्डा दिन्छ । भाले लामखुट्टे लगभग १० दिन तथा पोथी ६ देखि ८ हप्ता बाँच्ने विभिन्न अध्ययनले देखाएका छन् । अन्नपूर्ण पोस्टमा खबर छ ।