पहिलो पटक अफ्रिकी देश मोरिसससँग शनिवार नेपालले पहिलो मैत्रीपूर्ण फूटबल खेल खेल्दैछ ।

२ मैत्रीपूर्ण खेलका लागि नेपाल आएको मोरिससविरुद्ध नेपालले त्रिपुरेश्वरस्थित दशरथ रंगशालामा भिड्दा सुखद नजिताको लक्ष्य लिएर मैदान उत्रिनेछ ।

भ्रमणकारी टोली मोरिसस भने नेपाललाई रोक्ने रणनीतिका साथ घरेलु टोलीको सामना गर्नेछ ।

केही हप्तादेखी मोरिसससँगको खेलका लागि तयारी गरिरहेको नेपालको लक्ष्य अघिल्ला खेलमा भएका कमी कमजोरी सुधार गर्ने हुनेछ । खेलको अघिल्लो दिन शुक्रवार पत्रकार सम्मेलनमा टोलीका कप्तान किरण चेम्जोङले शनिवार मोरिससविरुद्ध मैत्रीपूर्ण खेलमा जीतका लागि खेल्ने बताए ।

पहिलो पटक ३४ खेलाडी राष्ट्रिय टोलीमा समावेश गरेका प्रशिक्षक अबदुल्लाह अलमुताइरी भने खेलअघिको पत्रकार सम्मेलनमा उपस्थित भएनन् । यसअघि सामाजिक सञ्जालमा नै मोरिसस विरुद्धको खेल हारेमा त्यसको सम्पूर्ण जिम्मेवारी आफूले लिने र जितेमा त्यसको सम्पूर्ण श्रेय खेलाडीलाई जाने बताएका प्रशिक्षक सामाजिक सञ्जालमा सक्रिय देखिए पनि एन्फाले आयोजना गरेको खेल अघिको पत्रकार सम्मेलनमा स्वास्थ समस्याका कारण उपस्थित नभएको सहायक प्रशिक्षकले श्रेष्ठले बताए ।

मुख्य प्रशिक्षक अलमुताइरीको स्थानमा पत्रकार सम्मेलनमा उपस्थित भएका सहायक प्रशिक्षक किरण श्रेष्ठले अफ्रिकी देश भएकाले शारीरिक हिसाबमा बलियो हुने भन्दै टोली संयमित हुँदै खेल्ने बताए । मैत्रीपूर्ण खेल एसियन कप छनोटको तयारीको रूपमा रहेको भन्दै सहायक प्रशिक्षक श्रेष्ठले अघिल्ला खेलमा भएका कमीकमजोरीलाई सुधार गर्दै सुखद नतिजाका लागि खेल्ने बताए ।

मोरिससका प्रशिक्षक टोनी फ्रान्कोइसले लामो समयपछि राष्ट्रिय टोलीले अन्तर्राष्ट्रिय भ्रमण गरेको तथा आपूmभन्दा बलियो टोली भएकाले २ अन्तर्राष्ट्रिय मैत्रीपूर्ण खेल प्रतिस्पर्धात्मक हुने बताए ।

शनिवार हुने पहिलो मैत्रीपूर्ण खेलपछि नेपालले दोस्रो मैत्रीपूर्ण खेल मंगलवार खेल्दैछ । दशरथ रंगशालामा हुने खेल अपराह्न ४ः४५ बजे हुँदैछ । खेलका लागि एन्फाले एकतिहाई दर्शकलाई प्रवेश अनुमति दिँदैछ । 

प्रवेशका लागि दर्शकले अनिवार्य पूर्ण खोप लगाएको हुनुपर्नेछ भने रंगशालाको गेटमा नै एन्फाले एन्टिजेन परीक्षण गर्नेछ ।