एमसीसीले गठबन्धन अप्ठेरोमा परेको बेला देउवालाई भेट्न प्रचण्ड बालुवाटारमा

प्रधानमन्त्री एवं कांग्रेस सभापति शेरबहादुर देउवा र माओवादी केन्द्रका अध्यक्ष पुष्पकमल दाहाल प्रचण्डबीच पछिल्लो घटनाक्रमका विषयमा छलफल भएको छ ।

अमेरिकी आर्थिक सहयोग मिलेनियम च्यालेन्ज कम्प्याक्ट (एमसीसी) अनुमोदनको विषयले सत्ता गठबन्धन अप्ठेरोमा परेको बेला प्रचण्ड बुधवार बालुवाटार पुगेका हुन् । 

प्रधानमन्त्रीले एमसीसी अगाडि बढाउने तयारी गरेपछि गठबन्धनमा खटपट परेको बेला प्रचण्डले देउवालाई भेटेका हुन् । 

प्रचण्डले यथास्थितिमा एमसीसी अनुमोदन गर्न नसकिने अडान राखेका छन् । देउवा र प्रचण्डबीच एमसीसी तथा स्थानीय तहको चुनाव मिति घोषणाबारे छलफल भइरहेको बालुवाटार स्रोतले बतायो । 

यसअघि गृहमन्त्री बालकृष्ण खाण र सञ्चार मन्त्री ज्ञानेन्द्रबहादुर कार्कीले प्रचण्ड निवास खुमलटारमा एमसीसीबारे छलफल गरेका थिए । 

गृहमन्त्री खाणले नेकपा एकीकृत समाजवादीका अध्यक्ष माधव नेपालसँग बुधवार बिहान उनकै निवास पुगेर भेट गरेका थिए ।