स्थानीय तहको चुनाव मिति घोषणालगायत विषयमा निर्णय लिन मन्त्रिपरिषद्को बैठक सोमवार बस्दैछ । 

प्रधानमन्त्री निवास बालुवाटारमा दिउँसो ३ बजेका लागि बैठक बोलाइएको एक मन्त्रीले लोकान्तरलाई जानकारी दिए । ‘आज मन्त्रिपरिषद्को नियमित बैठक हो, चुनावको मिति घोषणा पनि एजेण्डा हुन सक्छ,’ उनले भने । 

आगामी २०७९ जेठ ४ गतेका लागि स्थानीय तहको चुनाव मिति घोषणा गर्ने सहमति प्रधानमन्त्री र निर्वाचन आयोगबीच भइसकेको छ ।

निर्वाचन आयोगको सिफारिशमा गृह मन्त्रालयले मन्त्रिपरिषद्मा चुनाव मिति घोषणाको प्रस्ताव लैजाने तयारी गरेको छ । 

प्रमुख प्रतिपक्षी दल नेकपा एमालेका अध्यक्ष केपी शर्मा ओलीसँग आइतवार भएको भेटमा प्रधानमन्त्री शेरबहादुर देउवाले आज चुनावको मिति घोषणा गर्ने बताएका थिए । चुनावको मिति घोषणासँगै आज केही राजनीतिक नियुक्तिको सम्भावना रहेको स्रोतले बतायो ।