निर्वाचन आयोगले वैशाख ३० गते हुने स्थानीय तहको चुनावमा काठमाडौंलगायत केही महानगरमा विद्युतीय मतदान गर्नेबारे छलफल शुरू गरेको छ । महानगरमा विद्युतीय मतदान गर्ने विषयमा बुधवार आयोगको बैठकमा छलफल भएको हो । 

निर्वाचनको कार्यतालिका र केही महानगरमा विद्युतीय मतदान गर्ने विषयमा छलफल चलिरहेको हो । ‘काठमाडौं महानगरमा विद्युतीय मतदान गर्ने विषयमा छलफल चलिरहेको छ, काठमाडौं सहित उपत्यकामा अन्य नगरपालिकामा पनि विद्युतीय मतदान गर्ने विकल्पमा छलफल भइरहेको छ,’ आयोग स्रोतले लोकान्तरसँग भन्यो । 

आयोगको बैठकमा केही सूचना प्रविधि विज्ञलाई समेत सहभागी गराइएको छ ।

यसअघि काठमाडौं निर्वाचन क्षेत्र नम्बर १ मा २०६४ सालको चुनावमा विद्युतीय मशिनबाट मतदान भएको थियो ।

मतगणना छिटो हुने भएकोले विद्युतीय मतदानमा आयोगले जोड दिएको छ । आगामी २०७९ वैशाख ३० गते निर्वाचन आयोगले देशभर स्थानीय तहमा एकै चरणमा निर्वाचन गर्दैछ । 

निर्वाचनको तयारीमा होमिएको आयोगले एक दुई दिनमा निर्वाचन कार्यतालिका सार्वजनिक गर्ने तयारी गरेको छ ।