कांग्रेस सांसदलाई रामशरण महतको ब्रिफिङ- एमसीसी राष्ट्रको हितमा छ, अमेरिकी सेना आउँछ भन्नु सरासर गलत

नेपाली कांग्रेसका नेता एवं पूर्व अर्थमन्त्री डा. रामशरण महतले अमेरिकी आर्थिक सहयोग कार्यक्रम मिलेनियम च्यालेन्ज कम्प्याक्ट (एमसीसी) राष्ट्रहितमा रहेकोले जुनसुकै हालतमा पारित गर्नुपर्ने बताएका छन् । उनले एमसीसी इन्डो प्यासिफिक रणनीतिको अंग नभएको समेत दाबी गरे । 

मंगलवार कांग्रेस संसदीय दलको बैठकबाट बाहिरिने क्रममा महतले एमसीसी कार्यान्वयनले नेपालमा आर्थिक गतिविधि र लगानी बढ्ने बताएका हुन् । 

सांसद नरहेका महत संसदीय दलको बैठकमा सहभागी भएर सांसदहरूलाई एमसीसीबारे बताएका थिए ।

‘एमसीसी राष्ट्रको हितमा छ । सैन्य सम्झौता हुन्छ, अमेरिकी सेना आउँछ भन्ने सरासर झुट गलत कुरा हो । इन्डो प्यासेफिक रणनीति पनि होइन, कानूनविपरीत पनि छैन । जति पनि सहमति भएको छ नेपालकै कानूनबमोजिम भएको छ र नेपाली कर्मचारीले कार्यान्वयन गर्छन्,’ महतले भने, ‘एमसीसी कुनै पनि हालतमा पारित गर्न जरुरी छ, आर्थिक गतिविधि र लगानी बढ्ने, रोजगारी बढ्ने र आगामी वर्षमा विद्युत् उत्पादन बढ्दै जान्छ । साथसाथै निर्यात गर्न जरुरी छ ।’

कांग्रेस संसदीय दलको बैठकमा प्रधानमन्त्री एवं कांग्रेस सभापति शेरबहादुर देउवाले एमसीसी पारित हुने बताएका छन् ।