नेकपा माओवादी केन्द्रका नेता मात्रिका यादवले आफ्नो पार्टीले आन्दोलन गरेका कारण प्रतिनिधि सभामा सरकारको व्याख्यात्मक घोषणा आएको बताएका छन् ।

सरकारले संसद्मा पेश गरेको एमसीसीसम्बन्धी व्याख्यात्मक घोषणापत्रमाथि आइतवार प्रतिनिधि सभामा भएको छलफलमा भाग लिँदै यादवले व्याख्यात्मक घोषणा आएपछि एमसीसीसरह लागू हुने दाबी गरेका हुन् ।

‘म प्रचण्डलाई धन्यवाद दिन चाहन्छु, माओवादीले सडक आन्दोलन गरेपछि मात्र प्रधानमन्त्री व्याख्यात्मक घोषणासहित प्रस्ताव ल्याउन सहमत हुनुभयो,’ यादवले भने, ‘यो दस्तावेज एमसीसी सन्धिको अंग बन्ने छ, यही हाउसबाट पास भएपछि एमसीसी लागू हुने व्याख्यात्मक घोषणा लागू नहुने भन्ने हुन्छ र ?’

एमसीसीका कारण नेपाल कुनै एलायन्समा जान्छ कि भन्ने जनतामा रहेको भ्रम टुटेको उनले दाबी गरे । अमेरिकाकै अधिकारीले आईपीएसको अंग हो भनेको अवस्थामा व्याख्यात्मक घोषणामार्फत प्रस्ट गर्ने कोशिश भएको यादवले बताए ।

यसअघि आइतवार राति बसेको प्रतिनिधि सभाको दोस्रो बैठकमा अर्थमन्त्री जनार्दन शर्माले एमसीसीबारे सरकारको तर्फबाट व्याख्यात्मक घोषणापत्र पेश गरेका थिए ।