प्रधानमन्त्रीले धैर्यता राखेको भए प्रचण्ड–नेपालले जस्ताको तस्तै ल्याप्चे लगाउने रहेछन् : एमाले प्रमुख सचेतक

नेकपा एमाले संसदीय दलका प्रमुख सचेतक विशाल भट्टराईले एमसीसीको व्याख्यात्मक घोषणाको कुनै राजनीतिक र संवैधानिक हैसियत नभएको बताएका छन् । प्रधानमन्त्री शेरबहादुर देउवा नहतारिएको भए माओवादी केन्द्र र नेकपा एसले जस्ताको तस्तै ल्याप्चे लगाउने उनको दावी छ । 

आइतवार राति प्रतिनिधि सभाबाट एमसीसी अनुमोदन भएपछि संसद भवन परिसरमा पत्रकारहरुसँग कुरा गर्दै भट्टराईले माओवादी र नेकपा एसले दोहोरो चरित्र प्रदर्शन गरेको बताएका हुन् । 
‘जनता आश्चर्यचकित छन, आफै सरकारमा बस्ने, आफ्नै सरकारका विरुद्ध जनतालाई सडकमा आन्दोलनमा उतार्ने दोहोरो भूमिका निर्वाह गर्नुभयो’ भट्टराईले भने, ‘ प्रधानमन्त्री शेरबहादुर देउवा नहतारिएको भए उहाँहरु एमसीसीमा जस्ताको तस्तै ल्याप्चे लगाउन तयार हुनुहुने रहेछ ।’ सरकारले संसदमा पेश गरेको व्याख्यात्मक घोषणासहित आइतवार राति प्रतिनिधि सभाबाट एमसीसी अनुमोदन भएको हो ।