विप्लवको दाबी- एमसीसी प्रकरणमा भारत मुर्मुरिएर बसेको छ

नेकपा महासचिव नेत्रविक्रम चन्द विप्लवले अमेरिकी आर्थिक सहयोग कार्यक्रम एमसीसी पारित गरिएकोमा भारतसमेत असन्तुष्ट रहेको दाबी गरेका छन् । 

एमसीसीको विरोधमा साना ६ दलले शुक्रवार काठमाडौंमा आयोजना गरेको सभालाई सम्बोधन गर्दै विप्लवले एमसीसी प्रकरणमा छिमेकीहरूको असन्तुष्टि रहेको बताएका हुन् । 

‘एमसीसीको बारेमा भारत बोलेको छैन, मुर्मुरिएर बसेको छ,’ विप्लवले भने । 

सभामा नेकपा क्रान्तिकारी माओवादीका महासचिव मोहन वैद्यले पनि एमसीसी प्रकरणमा भारत सशंकित रहेको बताए । 

‘एमसीसी चीनविरुद्ध नाकाबन्दी गर्न ल्याइएको हो, त्यसैले चीनले चासो प्रकट गरिरहेको छ । चीन मात्र होइन यो भारतका विरुद्ध पनि परिलक्षित छ, त्यसैले भारतीयहरू पनि खुशी छैनन्, सशंकित छन्,’ वैद्यले भने ।