नेकपा (माओवादी केन्द्र)को केन्द्रीय समिति बैठक शुक्रवारबाट शुरू भएको छ । 

प्रतिनिधि सभाबाट अमेरिकी आर्थिक सहयोग परियोजना एमसीसी पास गर्न भूमिका खेलेको भन्दै पार्टीभित्र असन्तुष्टिका स्वरहरू उठिरहेका बेला बैठक बसेको हो । 

बैठकको पहिलो दिन सम्बोधन गर्दै अध्यक्ष पुष्पकमल दाहाल प्रचण्डले एमसीसीको बचाउ गरे । त्यतिमात्र होइन उनले एमसीसीको टुंगो लागेसँगै गठबन्धन निर्वाचनसम्म सुरक्षित रहने निश्चित भएको बताए । 

‘एमसीसीकै कारण गठबन्धन टुट्ने हो कि राष्ट्रिय राजनीति नै फेरि अन्योल र प्रतिगमनतिरै जाने हो कि भन्ने महसुश गरिएको थियो,’ उनले भने, ‘एक ढंगले त्यसको टुंगो लागेको छ । अबचाहिँ गठबन्धन पनि निर्वाचनसम्म सुरक्षित रहने करीब निश्चित भयो ।’

सत्ताबाट बाहिरिन नपरोस् भनेर एमसीसी पास गरेको भन्ने उनीमाथि लाग्दै आएको आरोपलाई पनि यसले थप बल पुगेको छ । पहिले राष्ट्रघाती भन्दै एमसीसीको विरोधमा रहेको माओवादी केन्द्र व्याख्यात्मक घोषणासहित पास गरेको भनेर ‘फेस सेभिङ’ गरिरहेको छ । तर, त्यो व्याख्यात्मक घोषणाको खासै अर्थ नभएको भन्दै पार्टीभित्र र बाहिर प्रचण्डको आलोचना भइरहेको छ । 

एमसीसी पास गर्न सघाएदेखि नै  प्रचण्डसँग असन्तुष्ट रहेका नेता नारायणकाजी श्रेष्ठले लिखित रूपमै फरक मत राखे । एमसीसी अनुमोदनका सम्बन्धमा फरक धारणा राख्दै आएको समूहको नेतृत्व गर्दै बैठकमा श्रेष्ठले लिखित धारणा पेश गरेका हुन् ।

त्यतिमात्र होइन उनले पार्टीमा दलालहरूसँग साठगाँठ गर्ने प्रवृत्ति बढेको समेत आरोप लगाए । 

‘पार्टीमा नोकरशाही, पुँजीपति तथा दलालहरूसँग साठगाँठ गर्ने प्रवृत्ति बढेको छ,’ बैठकमा श्रेष्ठले भने, ‘नेतृत्व नै चरम व्यक्तिवादी बनेको छ ।’

उनले प्रचण्ड र आफ्नो २०५३ देखिकै सम्बन्ध गम्भीर मोडमा पुगेको बताए । उनको यो अभिव्यक्तिले पार्टीभित्रको चरम असन्तुष्टि झल्काउँछ । 

प्रचण्डले एमसीसीका सम्बन्धमा धारणा सार्वजनिक गर्न सोमवार आयोजित पत्रकार सम्मेलनमा ‘कसैलाई पार्टी छाड्न मन लागे नरोक्ने’ अभिव्यक्ति दिएका थिए । सो विषयमा पनि श्रेष्ठले अध्यक्षले नै आफूलाई पार्टी छाड्न भनेका गुनासो गरेका थिए । प्रचण्डको सो अभिव्यक्तिपछि श्रेष्ठ पक्षधर नेताहरू असन्तुष्ट छन् ।

प्रचण्ड र श्रेष्ठबीच एमसीसीको विषयलाई लिएर निकै असन्तुष्टि उत्पन्न भएको छ । बैठकमा पनि निकै चर्काचर्की परेपछि पार्टीमा विद्रोह हुन सक्ने संकेत देखिएको नेताहरू बताउँछन् । 

तर, पूर्व स्थायी कमिटी सदस्य देव गुरुङले भने पार्टी एकता खल्बलिने अवस्था सिर्जना नभएको दाबी गरेका छन् । 

एमसीसीलगायत पार्टीभित्र रहेका मतभेदलाई समाधान गरेर जाने विषयमा बैठकमा छलफल भएको उनको भनाइ छ । 

‘अध्यक्ष प्रचण्ड र नेता नारायणकाजी श्रेष्ठ दुवैजनाको अभिव्यक्तिले पार्टी एकतामा व्यवधान गर्ने कुनै प्रश्न छैन, आजको बैठकले यही सन्देश दिएको छ,’ गुरुङले भने ।

‘पहिलो कांग्रेस, दोस्रो हामी’

बैठकमा अध्यक्ष प्रचण्डले आगामी चुनावमा कांग्रेस पहिलो र दोस्रोमा माओवादी हुने बताए । 

प्रयास एक नम्बर नै हुने भन्ने भए पनि अहिलेको स्थितिमा पहिलो भन्ने मनोगत मात्रै हुने उनको भनाइ छ । 

‘अहिलेको स्थितिमा पहिलो भन्नेचाहिँ मनोगत नै हो । तर, भूमिका चाहिँ पहिलो नै हो,’ उनले भने, ‘उम्मेदवार चयनदेखि भौतिक तयारी गर्ने हो भने हामी दोस्रो हुन्छौं ।’

समग्र देशको राजनीतिमा आफूहरू निर्णायक हुने उनको भनाइ छ । ‘हामीसँग एक दम समय कम छ, अब चुनाव आउन दुई महिना १० दिन मात्रै छ,’ उनले भने, ‘युद्धस्तरमा काम नगर्ने हो भने अप्ठ्यारो स्थिति आउन सक्छ, कांग्रेस र एमाले हाम्रा चुनौती हुन ।’ 

एमाले चलाख भएकाले गाउँगाउँ गइसकेको भन्दै प्रचण्डले कांग्रेसको आफ्नै खालको भोटबैंक रहेको बताए । 

उनले गठबन्धन र शक्तिलाई ठिक ढंगले परिचालन गर्न सके ‘लेफ्ट’को पहिलो हुने सम्भावना रहेको उनले बताए ।

शुक्रवारको बैठकमा अध्यक्ष प्रचण्डले व्याख्यात्मक घोषणासहित एमसीसी एमसीसी पारित गर्ने पार्टीको निर्णयलाई अनुमोदन गर्दै चुनावमा केन्द्रित हुन प्रस्ताव गरेका थिए ।

भृकुटीमण्डपस्थित राष्ट्रिय सभा गृहमा आजबाट शुरू भएको बैठक आइतवार बिहान ११ बजे बस्ने गरी स्थगित भएको छ ।