प्रमुख प्रतिपक्ष दल नेकपा एमाले अध्यक्ष केपी शर्मा ओलीले संसदीय दलको बैठकमा स्थानीय तहको चुनावमा राम्रो गरेका जनप्रतिनिधिलाई टिकटमा प्राथमिकता दिने बताएका छन् । 

पार्टीले चुनाव जित्नुपर्ने भएकोले राम्रो काम गरेकालाई टिकटमा पहिलो प्राथमिकता दिने ओलीको बताएको एमाले संसदीय दलका प्रमुख सचेतक विशाल भट्टराईले जानकारी दिए । 

‘जसले चुनाव जितेर राम्रो काम गरिरहेका छन् उनीहरूलाई नै टिकटको पहिलो प्राथमिकता हुन्छ । कतै बदमासी गरेकालाई परेछ भने सच्याइन्छ,’ ओलीको भनाइ उद्धृत गर्दै भट्टराईले भने, ‘यो चुनाव पार्टी जित्नका लागि हो । चुनावमा जित्ने बाहेक अरू उद्देश्य हुँदैन ।’

सरकारले प्रधानन्यायधीशविरुद्धको महाभियोग लम्ब्याएर अदालतबाट आफू अनुकूलको काम गर्ने उद्देश्य राखेको पनि ओलीले संसदीय दलको बैठकमा बताएका थिए । 

सभामुख अग्निप्रसाद सापकोटाले १९ पटक संसदको बैठक बोलाएको भए पनि ११ वटा बैठक मात्रै बसेको र त्यसमा सत्तारूढ गठबन्धनले आफ्नो उद्देश्य पूरा गर्ने काम मात्रै गरेको भट्टराईले बताए । 

एमालेले वेल घेराउ गर्दा पनि सभामुखले जबर्जस्ती बैठक चलाएर संसदीय मर्यादाको धज्जी उडाएको भट्टराईले बताए । 

स्थगित भएको संसद अधिवेशनबाट एमसीसी अनुमोदन गरिएको र प्रधानमन्त्री शेरबहादुर देउवाले एक दिन मात्रै कुरेर बसेको भए माओवादी र माधव नेपालको पार्टीले व्याख्यात्मक घोषणा विना नै ल्याप्चे लाउन तयार हुने अवस्था आउने भट्टराईको भनाइ छ । 

‘प्रधानमन्त्रीले एक दिन मात्रै कुरेको भए व्याख्यात्मक घोषणाको खोस्टो चाहिँदैनथ्यो माओवादी र माधव नेपालको पार्टी ल्याप्चे लगाउन तयार भइहाल्थ्यो,’ भट्टराईले भने ।