भारतीय प्रधानमन्त्री नरेन्द्र मोदीको निमन्त्रणमा भारत भ्रमणमा जान लागेका प्रधानमन्त्री शेरबहादुर देउवाको भ्रमण तालिका सार्वजनिक भएको छ । 

भारतको विदेश मन्त्रालयले प्रधानमन्त्री देउवाको भारत भ्रमणको कार्यतालिका सार्वजनिक गरेको हो । 

शुक्रवार दिउँसो भारतको नयाँदिल्ली प्रस्थान गर्न लागेका देउवा भारतीय समयअनुसार दिउँसो २ः५० बजे नयाँदिल्लीमा अवतरण गर्नेछन् ।

भारतमा सबैभन्दा पहिले भारतीय विदेशमन्त्री डा. एस जयशंकरसँग औपचारिक भेटवार्ता हुनेछ । देउवाको आतिथ्यताको लागि व्यवस्था गरिएको होटल आईटीसी मौर्यमा उनलाई भेट्न जयशंकर दिउँसो साढे ४ बजे आइपुग्नेछन् ।

शुक्रवार प्रधानमन्त्री देउवाको भारतीय पक्षसँग औपचारिक भेटवार्ताको कार्यक्रम छैन । शनिवार बिहान १०ः४० बजे प्रधानमन्त्री देउवाले राजघाट पुगेर महात्मा गान्धीको समाधिस्थलमा माल्यार्पण गर्ने कार्यक्रम तय भएको छ । 

त्यसपछि प्रधानमन्त्री देउवा र भारतीय समकक्षी नरेन्द्र मोदीबीच हैदरावाद हाउसमा भेटवार्ता हुनेछ । त्यसका लागि देउवा ११ः१० बजे हैदरावाद हाउस पुग्नेछन् ।

प्रधानमन्त्रीद्वयको द्विपक्षीय भेटवार्ता पनि दिउँसो १२ः१५ बजे हैदरावाद हाउसमा नै हुने र द्विपक्षीय सम्झौताको आदानप्रदान र प्रधानमन्त्रीहरूले संयुक्तरूपमा प्रेस वक्तव्य जारी गर्ने कार्यक्रम तय भएको छ । 

शनिवार दिउँसो साढे ४ बजे भारतका उपराष्ट्रपति वेन्कैया नायडूसँग प्रधानमन्त्री देउवाको भेटवार्ता हुनेछ । 

आइतवार बिहान ९ बजे प्रधानमन्त्री देउवा बनारसमा आयोजित कार्यक्रममा सहभागी हुन त्यसतर्फ प्रस्थान गर्ने कार्यक्रम छ ।

दिउँसो ४ बजे उनी दिल्ली फर्किसक्ने र सवा ४ बजे काठमाडौंतर्फ फर्कने कार्यक्रम तय भएको छ ।