नेकपा एमालेका अध्यक्ष केपी शर्मा ओलीले प्रधानमन्त्री शेरबहादुर देउवा नेतृत्वको वर्तमान सरकार जति धेरै चल्छ देश त्यति धेरै बर्बादीतिर जाने टिप्पणी गरेका छन् । 

झर्ने बेलाको फल जस्तै गठबन्धन कुहिन लागेकोले आफूहरूले एमालेले सरकार ढाल्न नलाग्ने उनले दाबी गरे ।

नेपाल राष्ट्रिय उद्योग व्यवसाय महासंघको दोस्रो महाधिवेशनलाई बुधवार काठमाडौंमा सम्बोधन गर्दै अध्यक्ष ओलीले यो सरकार तुरुन्त ढल्नुपर्ने बताएका हुन् । 

‘यो सरकार तुरुन्तै तुरन्तै तुरुन्तै ढल्नुपर्छ । ढलेन भने जतिदिन रहन्छ त्यति बढी देशलाई बर्बादीतिर धकेल्छ,’ ओलीले भने, ‘प्रहरी भाइहरूले झुक्किएर ताली हान्नु होला नि फेरि ! देश बनाउन त सबैलाई पनि परेको छ । जीविका चलाउनु परेको छ । कसैले ताली बजाउन मिल्छ कसैले मिल्दैन ।’ 

ओलीले वर्तमान सत्ता गठबन्धन कुहिएर झर्न लागेको फलजस्तो अवस्थामा पुगेको टिप्पणी गरे । ‘अहिलेको गठबन्धन सरकार कुहिएको फल जस्तो भएको छ,  मज्जाले केही हुँदैछ र झर्ने बेलातर्फ जाँदैछ,’ ओलीले भने, ‘कसैले पनि मर्न लागेको मान्छेलाई पनि प्वाक्क हानेर मर्‍यो भने उही कानून लाग्छ । यो सरकार ढाल्न हामी कोसिस गर्दैनौँ, कुहिएर खत्रक्क झरोस् ।’