ओलीले नागरिकलाई सपना देखाएर साकार बनाउन काम थाले : शंकर पोखरेल

नेकपा एमालेका महासचिव शंकर पोखरेलले नेकपा एमालेले विकास र समृद्धिको नेतृत्व गरेको बताएका छन् ।

नेकपा एमाले सञ्चार ईलाकाले शुक्रवार आयोजना गरेको कार्यक्रममा उनले एमाले नेतृत्वको सरकारले विगतमा धेरै कामको शुरूआत गरेको बताए ।

प्रधानमन्त्रीका रूपमा रहँदा केपी शर्मा ओलीले नागरिकलाई सपना देखाएका र ती सपना साकार बनाउन काम थालेका उनको भनाइ थियो ।

उनले भने, ‘हिजो शिल्यान्यास भएका योजनाको अहिले उद्घाटन भइरहेको छ ।’ नेकपा एमालेप्रति सबै उमेर, क्षेत्र र वर्गको आकर्षण बढिरहेको महासचिव पोखरेलले बताए । अहिले सबैतिर पार्टी प्रवेशको लहर नै रहेको उनले औंल्याए ।

यो पटक पहिलो पटक निर्वाचनमा सहभागी हुन लागेका धेरै एमाले र केपी ओलीप्रति आकर्षित भएको उनको भनाइ छ । नेकपा एमालेबाट नेकपा एकीकृत समाजवादी छुट्टिएर जाँदा पार्टीलाई कुनै नोक्सानी नभएको भन्दै उनले सो पार्टीमा गए जति पूर्व माओवादीबाट आएकाले समग्रमा पार्टीमा घाटा नभएको उनले बताए ।

नेकपा एमालेका प्रचार विभागका उपप्रमुख विष्णु रिजालले पार्टीमा अहिले कुनै पनि विवाद नभएकाले अघिल्लो निर्वाचनभन्दा बढी सिट जित्ने गरी लागिएको बताए ।