लुम्बिनी प्रदेशमा गठबन्धनलाई व्यवहारिक रुपमै कार्यान्वयनमा लैजाने सत्तारुढ पाँच दलका नेताहरूले निर्णय गरेका छन् । त्यसका लागि गठबन्धन दलको संयुक्त स्थलगत अनुगमन कार्यदलसमेत बनाइएको छ । 

गठबन्धन दलको सोमवार बुटवलमा बसेको बैठकले ‘संयुक्त स्थलगत अनुगमन कार्यदल’ गठन गरेको हो । 

कार्यदलमा कांग्रेसबाट राजु खनाल, नेकपा (माओवादी केन्द्र)बाट लुमकान्त न्यौपाने, नेकपा एकीकृत समाजवादीबाट अशोक कोइराला, जसपाबाट अशोकुमार यादव र राष्ट्रिय जनमोर्चाबाट बोमबहादुर खत्रीलाई कार्यदलमा राखिएको छ । गठबन्धनले पाँच दलीय गठबन्धनभन्दा बाहिर गएर तालमेल गर्न नपाइने निर्णय पनि गरेका छन् ।  

चुनावी गठबन्धनका सबै दलको प्रतिनिधित्व रहने गरी संयुक्त चुनाव प्रचार संयन्त्र गठन गर्ने, जिल्लास्तरीय गठबन्धन संयन्त्रको बैठकबाट सहमति कायम गरी सोको रिपोर्ट प्रदेशमा पठाउन आग्रह गर्ने निर्णय भएको कांग्रेस लुम्बिनी प्रदेश सभापति अम्मरसिंह पुनले जानकारी दिए । 

बैठकमा माओवादी केन्द्र प्रदेश अध्यक्ष सुदर्शन बराल, नेकपा एसका प्रदेश सचिव राजु गुरुङ, जसपाका अशोककुमार यादव र राष्ट्रिय जनमोर्चामा बद्रे आलम सहभागी थिए । 

केन्द्रमा पनि गठबन्धनका पाँच दलको बैठकले ठाउँ र अवस्थाअनुसार तालमेल गर्ने निर्णय गरेको छ ।