नेकपा एमालेका अध्यक्ष केपी शर्मा ओलीले चुनाव सार्ने सत्ता गठबन्धनको मतियार नबन्न नेत्रविक्रम चन्द ‘विप्लब’लाई आग्रह गरेका छन् ।

गठबन्धनको षड्यन्त्रको शिकार भएर चुनाव लड्ने बहाना नबनाउन ओलीले सुझाव दिए । 

ललितपुरमा मंगलवार पार्टी प्रवेश तथा नयाँ वर्षको शुभकामना आदानप्रदान कार्यक्रमलाई सम्बोधन गर्दै ओलीले विप्लबलाई चुनावमा सहभागी गराउने नाममा  वैशाख ३० गतेको चुनाव सार्ने बहाना मान्य नहुने बताएका हुन् । 

‘अहिले के चर्चा चल्न थालेको छ भने प्रचण्डको मतियार बनेर, साँगगाँठ गरेर चुनाव बिथोल्ने । ५ दलीय गठबन्धनको षड्यन्त्रको शिकार भएर विप्लबजीहरू मौका पायो भने चुनाव लड्छु भन्ने बहाना त बनाइरहनुभएको त छैन ?’ ओलीले भने, ‘विप्लबलाई चुनावमा भाग लिने वातावरण बनाइनुपर्छ, कुनै पनि बहानामा चुनाव सार्न पाइन्न, यो षड्यन्त्र कुनै पनि हालतमा मान्य हुँदैन ।’ 

जेलमा रहेका विप्लबका कार्यकर्तालाई जेलमुक्त गरेर चुनावमा भाग लिने वातावरण बनाउनुपर्ने तर त्यहीँ बहानामा चुनाव सार्न नपाइने ओलीले बताए ।

५ दलीय गठबन्धन चुनाव हुन नदिने षड्यन्त्रमा लागे पनि दबाबको भरमा मिति घोषणा गरिएको उनले बताए । ‘विगतमा पनि विभिन्न बहानामा चुनाव हुन नदिने प्रतिगमनमा देशलाई लैजाने काम भएको थियो । ५ दलीय गठबन्धनले हुन नदिन खोजेको थियो । विप्लबलाई बहाना बनाएर चुनाव पर सार्ने धन्दा मान्य हुन सक्दैन,’ ओलीले भने । 

ओलीले प्रचण्ड र माधव नेपालको पार्टी कम्युनिस्टको बर्को ओढेको नक्कली कम्युनिस्ट भएको आरोप लगाए ।