जनप्रतिनिधिले उम्मेदवारी दिन राजीनामा गर्नुपर्ने वा नपर्ने विषय वैशाख ४ गते टुंगिने

स्थानीय तहको निर्वाचनका लागि बहालवाला जनप्रतिनिधिले उम्मेदवारी दिन राजीनामा गर्नुपर्ने वा नपर्ने विषय सर्वोच्च अदालतले वैशाख ४ गते टुंगो लगाउने भएको छ ।

सर्वोच्च अदालतका न्यायाधीशद्वय तेजबहादुर केसी र कुमार रेग्मीको संयुक्त इजलासले दुवै पक्षलाई छलफलका लागि वैशाख ४ गते बोलाउने आदेश गरेको सर्वोच्चका प्रवक्ता विमल पौडेलले जानकारी दिए । 

निर्वाचन आयोगले बहालवाला जनप्रतिनिधि उम्मेदवार भए पदबाट राजीनामा गर्नुपर्ने प्रावधानसहितको निर्वाचन आचारसंहिता बनाएको छ । 

उक्त प्रावधान खारेज गर्नुपर्ने माग गर्दै हेलम्बु गाउँपालिकाका अध्यक्ष निमा ग्याल्जेन शेर्पाले सर्वोच्च अदालतमा रिट दर्ता गराएका थिए । सोही रिटमाथि आज सुनुवाइ गर्दै उक्त आदेश भएको हो ।