आइतवार बिहानदेखि सम्पर्क विहिन भएको तारा एयरको विमानको 'लोकेसन' पत्ता लागेको नेपाली सेनाले जानकारी दिएको छ ।

हराएको विमानको 'लोकेसन' पत्ता लागेको  ट्वीटरमार्फत नेपाली सेनाका प्रवक्ता सहायक रथी नारायण सिलवालले जानकारी दिएका छन् ।

उनले सेनाको टोली अहिले पत्ता लागेको 'लोकेसन'तर्फ गइरहेको समेत बताएका छन् ।

आज  बिहानैदेखि  सेनाको हेलिकप्टर सम्भावित स्थानमा परिचालन गरिएको छ । 

यस्तै सुरक्षाकर्मीको अर्को टोली पनि स्थलमार्गबाट परिचालन गरिएको छ । 

‘हराइरहेको विमान खोजीका लागि बिहान ५ बजेदेखि नै टोलीहरू खटिएका छन्,’ त्रिभुवन अन्तर्राष्ट्रिय विमानस्थलका महाप्रवन्धक प्रेमनाथ ठाकुरले लोकान्तरसँग भने ।

उनका अनुसार, अहिले खोजीकार्य जारी नै रहेको छ भने हालसम्म विमान बेपत्ता नै छ ।

सम्भावित स्थानहरूमा मौसमको  प्रतिकुल अवस्थाका कारण खोजी कार्यमा केही समस्या आइरहेको समेत उनले बताए । 

‘अहिले बेसीमा चाहिँ मौसम खुलेको छ, माथि माथि भने मौसम खुलेको अवस्था छैन,’ महाप्रबन्धक ठाकुरले भने,‘टोलीहरू माथि पुग्ने क्रममै रहेका छन् ।’

आइतवार बिहान पोखराबाट जोमसोमका लागि उडेको तारा एयरको जहाज मुस्ताङको आकाशबाट वेपत्ता भएको थियो । 

सुरक्षाकर्मीको टोलीले विमान मुस्ताङको टिटी क्षेत्रमा बेपत्ता भएको हुनसक्ने भन्दै सो क्षेत्रलाई केन्द्र बनाएर खोजी कार्य जारी राखेको छ । 

आइतवार दिनभर खोजी चलेपनि विमान फेला पर्न सकेको थिएन । विमानमा १९ यात्रु र चालक दलका ३ सदस्य गरी २२ जना सवार थिए ।