मुस्ताङमा विमान दुर्घटनाको अनुसन्धान गर्न सरकारले बनायो दुर्घटना जाँच आयोग

मुस्ताङमा भएको जहाज दुर्घटनाको अनुसन्धान गर्न सरकारले दुर्घटना जाँच आयोग गठन गरेको छ । 

संस्कृति, पर्यटन तथा नागरिक उड्डयन मन्त्रालयको मन्त्रीस्तरीय निर्णयअनुसार वरिष्ठ एरोनटिकल इञ्जिनियर रतिशचन्द्रलाल सुमन जाँच इन्चार्ज रहने गरी ५ सदस्यीय आयोग गठन गरिएको हो । 

आयोगका सदस्यहरूमा क्याप्टेन दीपुराज ज्वार्चन, वरिष्ठ मेन्टिनेन्स इञ्जिनियर उपेन्द्रलाल श्रेष्ठ र वरिष्ठ मौसमविद् मणिरत्न शाक्य रहेका छन् । 

सदस्य सचिवमा भने सहसचिव बुद्धिसागर लामिछाने छन् । 

आइतवार पोखराबाट जोमसोमका लागि उडेको तारा एयर ९ एन–एईटी कलसाइनको ट्वीनअटर जहाज मुस्ताङको थासाङ गाउँपालिका–२ को सानुसरे भन्ने ठाउँमा दुर्घटनाग्रस्त अवस्थामा फेला परेको थियो । 

जहाजमा १३ जना नेपाली यात्रु, ६ जना विदेशी र ३ जना चालक दलसहित २२ जना सवार थिए ।