कृषि विकास तथा पशुपक्षी मन्त्री महिन्द्र यादवले असार १५ सम्म ५२ हजार मेट्रिकटन रासायनिक मल नेपाल आउने बताएका छन् । असार मसान्तसम्म भारतबाट ८० हजार मेट्रिकटन मल आउने उनले बताए । 

प्रतिनिधि सभामा विनियोजन विधेयकमाथि उठेका प्रश्नको जवाफको क्रममा मन्त्री यादवले साल्ट टे«डिङमार्फत आउने ५२ हजार मेट्रिकटन मल असार १५ सम्म आउने बताएका हुन् ।

‘असारको १५ गतेसम्म साल्ट ट्रेडिङको मल आउँछ । डीएपी र युरिया गरेर ५२ हजार मेट्रिक टन मल आउँछ । नेपालसँग १४ देखि १५ हजार मेट्रिक टन मल मौज्दात छ,’ यादवले भने, ‘असार मसान्तभित्रमा ८० हजार मेट्रिकटन मल आउँछ । भारतले दिने भनेको १ लाख ५० हजार मेट्रिक टन मलमध्ये दोस्रो चरणमा यसै वर्षभित्र आउँछ ।’

मन्त्री यादवले युक्रेन र रसिया युद्धका कारण अन्तर्राष्ट्रिय बजारमा मल अभाव भएको बताए । 

नेपालमा मलको कारखानाका लागि लामो समयदेखि गृहकार्य भएको र यसपालिको बजेटमा छुट्टिएको बताए । ‘लगानी बोर्डमा सम्भाव्यता अध्ययन भइरहेको छ । चाँडै प्रक्रिया टुंगो लाग्ला,’ उनले भने ।