दाङस्थित प्रेमीको घरमा पसेर उनकी पत्नी र छोरीमाथि कुटपिटमा उत्रिएकी लुम्बिनी प्रदेशकी स्वास्थ्य राज्यमन्त्री विमला वलीको घटनाका विषयमा छानबिन गर्न बनेको टोली तुलसीपुर पुगेको छ ।

आन्तरिक मामिला तथा सञ्चारमन्त्री तिलकराम शर्मा, महिला, बालबालिका तथा कानूनमन्त्री रमा घर्ती, मुख्य न्यायाधीवक्ता श्रीकृष्ण सुवेदी सहितको टोली गएको हो । 

समितिका सदस्य मन्त्री शर्माले बुधवार र बिहीवार घटनाबारे बुझेर टोली बुटवल फर्किने बताए । ‘अहिले हामीले केही भन्ने कुरा हुँदैन, हामी दाङमै छौं । छानबिन गरेपछि प्रतिवेदन सार्वजनिक गर्छाैं,’ शर्माले लोकान्तरसँग भने ।

टोलीले प्रहरी र एकराजको परिवारसँग पनि बुधवारै छलफल गर्ने बताइएको छ तर त्योबारे मन्त्री शर्माले खुलाउन चाहेनन् । 

विमला यसअघि पनि विवादमा आइरहेकै व्यक्ति हुन् । जेठ ३१ गते सरकारी झण्डावाल गाडीमा निजी सुरक्षा अधिकारी (पीएसओ) सहित सर्वसाधारणको घरमा घुसेर राज्यमन्त्री वलीले कुटपिट गर्नु अस्वाभाविक थियो ।

राज्यमन्त्री वलीले एकराजको घर तुलसीपुर–५ मा बिहानै गएर ‘मेरो एकराज खै’ भन्दै उनीकी पत्नी मीना भण्डारी र उनकी ६ वर्षकी छोरीलाई कुटपिट गरेको आरोप छ । कुटपिट घटनापछि प्रहरीले उनलाई पक्राउ गरेको थियो ।

पक्राउ गरेपछि वलीलाई मुख्यमन्त्री कूलप्रसाद केसीको दबाबमा राति बुटवल ल्याएको थियो । वली बिरामी भएको भन्दै राती नै लुम्बिनी प्रादेशिक अस्पताल बुटवलमा भर्ना भएकी थिइन् । 

सरकारले बजेट पारित गर्नुपर्ने बेला भएकाले छिटो प्रतिवेदन तयार पार्नतर्फ छानबिन समितिको टोली लागिरहेको छ । एकराज वाइसीएल नेता हुन् । उनीसँग आफ्नो आर्थिक लेनदेन भएको भन्दै घरमा गएको वलीले बताएकी थिइन् ।

एकराजले आफ्नो लाखौं रकम सापटी लिएको र हालसम्म नदिएको भन्दै त्यो रकमका विषयमा बुझ्न घर गएको विमलाले बताएकी छन् । घरमा जाँदा एकराज नभेटिएको र घरमा रहेकी पत्नीसँग हात हालाहालको अवस्था भएको थियो । 

एकराजकी पत्नी मीना भण्डारीले आफूमाथि हातपात गरेको भनी आरोप लगाएकी थिइन् । उनले अभद्र व्यवहारमा प्रहरीसमक्ष जाहेरी पनि दिएकी छन् ।

प्रदेश सरकारको असार १ गते बसेको मन्त्रिपरिषद् बैठकले राज्यमन्त्री वलीको घटनाबारे सत्यतथ्य छानबिन गर्न मन्त्री शर्माको नेतृत्वमा ३ सदस्यीय समिति बनाएको थियो ।