डोनेत्स्क जनगणतन्त्रका सूचना राज्यमन्त्री ड्यानील बेसोनोभले रुसको विशेष सैन्य कारवाहीको आरम्भदेखि अहिलेसम्म ५० हजारभन्दा बढी युक्रेनी सैनिक मारिएको बताएका छन् । 

लडाइँका लागि तम्तयार युक्रेनी सैन्य इकाइहरूमध्ये अधिकांश ध्वस्त भएको वा कब्जामा परेको पनि उनले बताए । 

‘मेरो सूचनाअनुसार, अहिलेसम्म समग्र हिसाब गर्दा उनीहरूको ५० हजारभन्दा बढी सैनिक मारिइसकेका छन् । अनि एक लाख ५० हजारभन्दा बढी सैनिक घाइते भएका छन्,’ बेसोनोभले बताए । 

युक्रेनी सैनिकहरूले पनि यसलाई पुष्टि गरेका छन् । सेभेरोडोनेत्स्क क्षेत्रमा खटिएका एक युक्रेनी अधिकारीसँगको अन्तर्वार्ता स्काई न्युज एजेन्सीले प्रकाशित गरेको छ ।

युक्रेनी मरिन कोर्प्सका कमान्डर ओलेक्जेन्डरले राम्रो तालिम पाएका सबै सैनिक मारिएको बताए । तालिमप्राप्त तथा युद्धको अनुभव बोकेका लगभग ८० प्रतिशत सैनिक मारिएका छन् । 

यस्तो भारी क्षतिले अन्य सैन्य इकाइमा बलियो भावनात्मक तथा मनोवैज्ञानिक असर पारेको उनी बताउँछन् । युक्रेनी सेनाले कतिञ्जेलसम्म यस्तो क्षतिलाई बेहोर्न सक्ने आफूलाई थाहा नभएको उनको भनाइ छ । 

रुसको सैन्य सञ्चारमाध्यमहरूले युक्रेनी युद्धबन्दीसँग गरेको अन्तर्वार्तामा युक्रेनी सेनाको जनशक्ति घटिरहेको र उसले तालिम नपाएका सैनिकहरूलाई अग्रमोर्चामा बलिको बोको बनाएर राखेको बताइएको छ ।