सभामुख अग्निप्रसाद सापकोटा नेतृत्वको संसदीय प्रतिनिधिमण्डल अजरबैजानतर्फ प्रस्थान गरेको छ । 

अजरबैजानको संसदको आयोजनामा असार १६ देखि १८ (जुन ३०-जुलाई २) सम्म बाकुमा हुन गइरहेको असंलग्न आन्दोलन संसदीय सञ्जालको सम्मेलनमा सहभागी हुन प्रतिनिधिमण्डल मंगलवार बिहान सवा ११ बजे त्यसतर्फ प्रस्थान गरेको हो । 

प्रतिनिधिमण्डलमा प्रतिनिधि सभा सदस्य पुष्पा भुसाल, राष्ट्रिय सभा सदस्य रामचन्द्र राई र सभामुखका स्वकीय सचिव गोविन्द पाठक छन् । 

उक्त कार्यक्रममा सभामुखले असंलग्न आन्दोलनको आवश्यकता एवं महत्त्व र यो अभियानका पक्ष राष्ट्रहरुका संसदहरुबीचको सहकार्य अभिवृद्धि सम्बन्धमा नेपालको प्रतिनिधित्व गर्दै सम्बोधन गर्नेछन् । 

सम्मेलनमा असंलग्न आन्दोलन संसदीय सञ्जालको कार्यविधि अनुमोदन गर्ने र बाकु घोषणा जारी गर्ने कार्यक्रम रहेको सभामुखको सचिवालयले जानकारी दिएको छ । 

सचिवालयका अनुसार सम्मेलनका क्रममा सभामुखबाट विभिन्न राष्ट्रका उच्चस्तरीय पदाधिकारीसँग द्विपक्षीय भेटघाट गर्ने कार्यक्रम पनि छ । 

प्रतिनिधिमण्डलका सहभागीलाई खानेपानी मन्त्री उमाकान्त चौधरी, संघीय संसदका महासचिव र प्रतिनिधि सभाका सचिवलगायतले बिदाइ गरेका थिए । 

प्रतिनिधिमण्डल असार १९ गते आइतवार साँझ नेपाल फर्कने समय तालिका छ ।