नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले स्थानीय तह निर्वाचनमा अन्तर्घात गर्नेलाई कारवाही हुने बताएका छन् ।

बिहीवार पार्टीको केन्द्रीय समिति बैठकमा चुनावी नतिजाबारे बोल्दै अध्यक्ष प्रचण्डले अन्तर्घातबारे छानबिन हुने बताए ।

‘अन्तर्घातीलाई कारबाही हुन्छ । मधेशमा कतिपय स्थानमा पुरानालाई नै दोहोर्‍यायौं, त्यो गल्ती थियो । अर्को पार्टीले निर्णय गरिसकेपछि सबै मिलेर लाग्नुपथ्र्यो तर पार्टीभित्र विभिन्न स्वार्थ समूह गुटले अर्कोलाई परास्त गर्न सफलता जस्तो ठान्यो । म पनि अन्तरघाती नै बनेको छु भनेर मातृकाले भन्नुभयो । ममाथि पनि आरोप छ । अरु सिनियर नेतामाथि पनि आरोप छ । यो पार्टीमा विचलन हो भन्ने प्रमाण हो । वैचारिक राजनीतिक कार्यदिशाको सवालमा विचलन छ,’ प्रचण्डले भने ।

छानबिन गरेर दोषी प्रमाणित भएकालाई कारवाही हुने उनले बताए । ‘ठूलोस्तरको अन्तर्घात चाहिँ केही खास ठाउँमा छ, सिरहा र महोत्तरीमा अन्तर्घात चर्को छ, अन्यमा पनि छ । पश्चिमतर्फ जाँदा बर्दियामा गम्भीर खालको छ । बर्दिया सम्भावना भएको जिल्ला हो । म कार्यक्रममा जाँदा पनि अप्ठ्यारो अवस्था भयो । तराईमा धेरथोर सबैतिर देखिएको छ र पहाडमा पनि । यसलाई के गरी समाधान गर्ने भन्ने कुरा जुन उठेको छ, यसलाई हामीले छानबिन गर्नैपर्छ । दोषी प्रमाणित भएकालाई कारवाही गर्नैपर्छ । निलम्बन र निष्कासनसम्मको व्यवस्था विधानमा गरिएको छ, सोही अनुसार हुन्छ । निर्वाचनमा हुनसक्ने सम्भावित अन्तर्घातलाई रोक्न पनि १५ दिनभित्रै गम्भीर प्रकृतिका जिल्लामा आवश्यक परे जाने र अन्यमा रिपोर्ट मगाउने गरी एउटा कमिटी बनाउने ।’