कांग्रेसका प्रदेश अध्यक्षले भने- प्रदेश समितिलाई पंगु बनाइयो, खारेज गरौँ

नेपाली कांग्रेसका लुम्बिनी सभापति अम्बर शाहीले पार्टी विधि र विधानसम्मत् नचलेको बताएका छन् । 

सोमवारबाट सानेपामा शुरू भएको केन्द्रीय समितिको बैठकमा धारणा राखिसकेपछि सञ्चारकर्मीसँग उनले केन्द्रीय समितिले वडासम्मै हस्तक्षेप गर्ने गरेको आरोप लगाएका हुन् । 

‘प्रदेशलाई निरीह बनाइएको छ, वडासम्मै केन्द्रले हस्तक्षेप गरेको छ,’ उनले भने, ‘प्रदेशलाई पंगु बनाउने काम भइरहेको छ, त्यसो हो भने प्रदेश सरकार खारेज गरे हुन्छ भनेर बैठकमा भनेको छु ।’

उनले प्रदेश समिति सञ्चालन गर्न समस्या भएको बताए । लेबिबाट प्राप्त हुने रकम पनि प्रदेशलाई कम छुट्याइने गरेको उनको गुनासो छ । 

‘राजनीतिक नियुक्ति गर्दा संस्थागत रुपमा गरियोस्, बजेट बाँडफाँट गर्दा शक्तिशाली नेताको क्षेत्रमा धेरै बजेट राख्ने र अन्यकोमा कम दिने प्रवृत्तिले  संगठन कमजोर हुन्छ, एउटा मापदण्ड बनोस् भनेको छु,’ उनले भने ।