नेपाली कांग्रेसका केन्द्रीय सदस्यहरूले गठबन्धनलाई आगामी संघ र प्रदेशको निर्वाचनसम्म लैजानुपर्नेमा जोड दिएका छन् ।

नेपाली कांग्रेसको जारी केन्द्रीय कार्यसमिति बैठकमा बोल्ने क्रममा केन्द्रीय सदस्यहरूले नेपाली कांग्रेसले विजय हासिल गर्नुमा गठबन्धनले मद्दत गरेको बताएका छन् ।

केन्द्रीय सदस्यहरूले गठबन्धनले समग्र परिणाममा राम्रो गरेकाले अगामी निर्वाचनसम्म गठबन्धनलाई निरन्तरता दिनुपर्ने धारणा राखेका हुन् । नेताहरूले समानुपातिक निर्वाचन प्रणाली भएका कारण पनि गठबन्धन गर्नुको विकल्प नभएको धारणा राखेका प्रवक्ता डा. प्रकाशशरण महतले बताए ।

विगतको गठबन्धनबाट पाठ सिकेर साउन भित्रैमा गठबन्धनको विषयमा टुंगो लगाउनुपर्ने र भदौ महिनाभित्रैमा पार्टीको टिकटको टुंगो लगाइसक्नुपर्नेमा नेताहरूले जोड दिएका प्रवक्ता महतले जानकारी दिए ।

उनले भने, ‘समग्रमा समीक्षाका कुराहरू र आगामी दिनमा कसरी पार्टी जानुपर्छ भन्ने विषयमै छलफल केन्द्रित छ । आज बोल्ने सबै साथीहरूले यो गठबन्धनलाई अगाडि बढाउनुपर्छ, हाम्रो समानुपातिक निर्वाचन प्रणाली छ । त्यो कारणले पनि त्यसको अहिले विकल्प छैन । स्थानीय निकायमा निर्वाचन भयो, त्यहाँ निर्वाचनको अनुभवलाई आधार मानेर कहाँ कमी, कमजोरी रहे, गठबन्धन भएको ठाउँमा पनि कार्यान्वयनको सिलसिलामा के–कस्ता कमी, कमजोरीहरू रहे, त्यसलाई पनि मध्यनजर राखेर यो साउनभित्र नै गठबन्धनको टुंगो लगाउने र भदौभित्र नै पार्टीको टिकट टुंगो लगाइसक्नुपर्छ, समयमा त्यो भयो भने हाम्रा आफ्ना कुराहरूलाई समयमै स्पष्ट ढंगबाट जनताको बीचमा राख्न सकिन्छ र परिणाम राम्रो आउँछ ।’

उनले नेताहरूको पार्टीप्रतिको असन्तुष्टि र फरक मतहरू बाहिर नराख्न नेताहरूलाई आग्रह गरिएको बताए । उनले असन्तुष्टिहरू पार्टी बैठकमा राख्न आग्रह गरिएको जानकारी दिए । उनले पार्टी एकतावद्ध रहेको सन्देश दिनका लागि सबै विषय बैठकभन्दा बाहिर राख्नु नहुने बताए ।

उनले भने, ‘जति पनि पार्टी भित्रका असन्तुष्टि अथवा फरक मतका विषयवस्तुहरू छन् । केन्द्रीय कार्यसमितिभित्रै ती कुराहरू राखिदिँदा बरु यहीँ जति कुरा राखे भो । त्यसका लागि बाहिर नै गएर भन्नुपर्ने स्थिति नआउँदा राम्रो हुन्छ । त्यसो भयो भने हाम्रो एकता र हाम्रो लक्ष्यप्रति हामी सबै एकजुट छौं भन्ने सन्देश जनताको बीचमा जान्छ । केन्द्रीय समितिमा छलफलमा कुनै पनि विषय प्रवेश गराउन कुनै अप्ठ्यारो पनि छैन । केन्द्रीय समितिमा बोल्न पाइएन त्यसकारण अन्त गएर बोल्नुपर्ने, भन्नुपर्ने स्थिति छैन ।’

प्रवक्ता महतले शेरबहादुर देउवा नेतृत्वको सरकारको १ वर्ष सन्तोषजनक रहेको बताए । सरकारले भ्रष्टाचार रोकेको उनले बताए । कोभिड–१९ को व्यवस्थापन गर्न सफल भएको र सन्तुलित विदेश नीति सञ्चालन गर्न सफल भएको उनले बताए ।

उनले भने, ‘१ वर्षको हाम्रो अनुभव सन्तोषजनक ढंगले सरकार चलेको छ । कतिपय उपलब्धिहरू यो सरकारले हासिल गरेको छ । कोभिडको व्यवस्थापन भएको छ । ठूलो भ्रष्टाचार एकपछि अर्को काण्डै काण्ड भएको अवस्था थियो, त्यो रोकिएको छ । वैदेशिक नीतिमा अन्यौल थियो । एमसीसी पारित भएको छ र सन्तुलित नेपालको आवश्यकता र स्वार्थमा आधारित विदेश नीति सञ्चालन भएको छ । आफ्ना कुराहरू हामीले सु–स्पष्ट ढंगबाट सबै मित्रराष्ट्रका प्रतिनिधिहरुलाई हामीले राख्न थालेका छौं । समग्रमा सन्तोषजनक छ । हामीले असन्तुष्ट हुनुपर्ने कारण छैन ।’

पार्टी केन्द्रीय समिति बैठकमा नेताहरूले महंगी नियन्त्रण गर्न र मलको सहज आपूर्तिका लागि सरकारले तदारुकता देखाउनुपर्ने माग गरेका थिए ।