भारतीय जनता पार्टी (भाजपा)को निमन्त्रणमा नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ शुक्रवार भारतको राजधानी नयाँ दिल्ली जाने भएका छन् । प्रचण्डका स्वकीय सचिव रमेश मल्लले तीन दिने भ्रमणका लागि प्रचण्ड भारत जान लागेको पुष्टि गरे । 

‘भाजपा अध्यक्ष जेपी नाड्डाको निमन्त्रणामा अध्यक्ष ‘प्रचण्ड’ भारत जान लाग्नु भएको हो, त्यसक्रममा उच्चस्तरीय राजनीतिक भेटवार्ताको सम्भावना छ’ मल्लले भने । तीनदिने भ्रमणको शिलशिलामा प्रचण्डले भारतका अन्य नेताहरूसँग पनि भेटवार्ता गर्ने कार्यक्रम छ । 

भारतीय प्रधानमन्त्री नरेन्द्र मोदीसँगको भेटवार्ता पक्का भएपछि मात्र ‘प्रचण्ड’ भारत जान तयार भएका स्रोतले बतायो । नेपाली कांग्रेसका सभापति एवं प्रधानमन्त्री शेरबहादुर देउवाले गत चैत्र १८ देखि २० सम्म गरेको भारत भ्रमणको शिलशिलामा भाजपा मुख्यालयको भ्रमण गरेका थिए ।
 
प्रधानमन्त्री पत्नी एवं नेपाली कांग्रेसकी केन्द्रीय सदस्य डा. आरजु देउवा पनि अहिले भारतमै छिन् । गठबन्धन सरकारले प्रतिनिधिसभा चुनावको मिति घोषणा गर्ने तयारी गर्दैगर्दा हुन लागेको प्रचण्डको भारत भ्रमणलाई अर्थपूर्ण रूपमा हेरिएको छ ।