नेपाली कांग्रेसका सांसद मीनेन्द्र रिजालले नेकपा एमालेको अहंकारका कारण वर्तमान प्रतिनिधिसभाले राम्रोसँग काम गर्न नसकेको टिप्पणी गरेका छन् । 

शुक्रवार प्रतिनिधिसभा बैठकमा उपसभामुखकी उम्मेदवार पुष्पा भुसाललाई समर्थन गर्ने क्रममा रिजालले अहंकारबाट संसदको कार्यकाल शुरू भएको बताएका हुन् । 

‘स्मृति मेटिदै जाँदो रहेछ, यो संसद विधिमा चलेन । प्रतिनिधिसभा सदस्यको शपथ नलिई प्रधानमन्त्रीको शपथ लिने चलन यहाँ शुरू भयो । अलि दिनपछि हामी मिल्छाैँ भनेर सभामुख  र उपसभामुखको चुनाव गरियो’ रिजालले भने । २०७४ साल फागुन ३ गते केपी ओली प्रधानमन्त्री नियुक्त भएका थिए । फागुन २१ गते मात्र सांसदले शपथ लिएका थिए । 

रिजालले त्यो बेला आफूहरू प्रतिपक्षमा रहेको समयमा उपसभामुखको चुनावको कुरा उठाइएको बताए । ‘कांग्रेस चाहिँदैन यहाँबाट निस्केर गए हुन्छ भनिएको होइन ? यति ठूलो अहंकारबाट संसदको कार्यकाल शुरू भएको थियो’ रिजालले भने ।