नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले भारतीय प्रधानमन्त्री नरेन्द्र मोदीसँग भेट हुन नसकेको कारणबारे आफूलाई पनि थाहा नभएको प्रतिक्रिया दिएका छन् । 

३ दिने भारत भ्रमणबाट आइतवार स्वदेश फर्किएका प्रचण्डले विमानस्थलमा पत्रकारहरूसँग कुराकानी गर्दै मोदीसँगको भेट अन्तिम समयमा आएर सम्भव नभएको बताए । 

‘आज दिउँसो १ बजे उहाँसँग भेट हुने भनिएको थियो । हामी त्यसैअनुसार भारतीय जनता पार्टीको कार्यालयबाट निस्किएका थियौं । होटल जाँदै गर्दा बाटोमा उहाँसँग भेट सम्भव नभएको सन्देश आयो,’ प्रचण्डले भने, ‘किन भेट हुन सकेन भन्ने कुरा तपाईंहरूजस्तै मलाई  पनि जानकारी छैन ।’

पार्टी अध्यक्षको निम्तोमा आएपछि अध्यक्षसँगको भेट नै क्लाइमेक्स हो भनेर पनि भेट नभएको हुनसक्ने चर्चा दिल्लीमा भएको उनले बताए । 

अर्कोतर्फ भारतमा धेरै ठाउँमा डुबान भएको, मोदी हिजो त्यसको निरीक्षणमा गएका र त्यसैकारण व्यस्त सेड्युल बनेर पनि भेट नभएको हुनसक्ने प्रचण्डले अनुमान गरे ।

उनी भारत भ्रमणमा जाँदा भारतीय प्रधानमन्त्री नरेन्द्र मोदीसँग पनि भेट हुने बताइएको थियो तर आफूले भन्नुपर्ने कुराहरू भारतीय अधिकारीसँग भनेकाले भेट नभएकोमा आफूलाई कुनै गुनासो नभएको प्रचण्डले बताए ।
 
‘मैले भन्नुपर्ने कुरा सरकारका अधिकारी र पार्टीका नेताहरूलाई भनिसकेको थिए । भाजपाका अध्यक्षसँगै विशेष कुराकानी भइसकेको थियो,’ उनले भने । 

भारत भ्रमणको क्रममा सन् १९५० को सन्धि, ईपीजीको प्रतिवेदन सार्वजनिक गर्ने, व्यापार घाटा सन्तुलित गर्ने, इन्धनको मूल्य घटाउने लगायतका विषयमा कुराकानी भएको प्रचण्डले बताए । 

भारत भ्रमणको क्रममा आफूले भारतीय पक्षबाट न्यानो स्वागत पाएको पनि उनले बताए । 

‘म प्रधानमन्त्रीको रूपमा जाँदा र अहिले जाँदा उहाँहरूले गरेको स्वागतमा खासै भिन्नता थिएन । विमानस्थलदेखि नै न्यायो आतिथ्यता पाएँ,’ प्रचण्डले भने ।