नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले भारत भ्रमण आफूले सोचेअनुसार नै फलदायी भएको बताएका छन् । 

३ दिने भारत भ्रमण पूरा गरी आइतवार स्वदेश फर्किएका प्रचण्डले विमानस्थलमा सञ्चारकर्मीसँग कुराकानी गर्दै देशहितको पक्षमा भारतीय अधिकारीहरूसँग फलदायी छलफल भएको बताएका हुन् । 

भारतीय जनता पार्टी (भाजपा) का अध्यक्ष जेपी नाड्डाको निमन्त्रणामा प्रचण्ड शुक्रवार भारत भ्रमणमा गएका थिए । भारत भ्रमणमा आफूले न्यायो स्वागत पाएको पनि उनले बताए । 

‘सरकार र भाजपाको जुन–जुन सम्मान र सुरक्षाको जस्तो व्यवस्था गरियो, पहिला प्रधानमन्त्री भएर जाँदा भन्दा फरक लागेन । उस्तै उस्तै गरेको पाइयो,’ प्रचण्डले भने । 

भारत भ्रमण आफूले यहाँबाट जाने बेलामा सोचेकोभन्दा फलदायी भएको उनले बताए । प्रचण्डले भने, ‘कतिपय सन्दर्भमा मैले सोचेभन्दा राम्रो भएको छ ।’

प्रचण्डले भारत भ्रमणको क्रममा भारतका विदेश सचिव, राष्ट्रिय सुरक्षा सल्लाहकार अजित डोभल, भारतीय विदेश मन्त्री एस जयशंकर, भाजपाका अध्यक्ष जयप्रकाश नाड्डा लगायतसँग भेटवार्ता गरेका थिए । 

भेटको अवसरमा सन् १९५० को सन्धि, ईपीजीको प्रतिवेदन सार्वजनिक गर्ने, व्यापार घाटा सन्तुलित गर्ने लगायतका विषयमा कुराकानी भएको प्रचण्डले बताए । 

उनले भने, ‘भारतीय विदेश मन्त्रीसँगको भेट कस्तो होला भन्ने लागेको थियो । संविधान घोषणाको बेलामा त्यति मीठो संवाद नभएको पृष्ठभूमिमा कस्तो संवाद होला भन्ने लागेको थियो तर अहिले सन्दर्भ फेरिएको छ । निकै फलदायी कुराकानी भएको छ । विदेशमन्त्री र विदेश सचिवसँग भएको भेटवार्तामा सबैजसो विषयमा छलफल भएको छ ।’

विक्रम संवत् २०७२ सालमा नेपालमा संविधान जारी नगर्न भन्दै जयशंकर नेपाल आएका थिए । उनी त्यसबेला विदेश मन्त्रालयका सचिव थिए । तत्कालीन प्रधानमन्त्री मोदीको दूत भएर उनी त्यसबेला नेपाल आएका थिए । त्यसबेलाको नेपाल भ्रमणमा जयशंकरले नेपाली नेताहरूको खप्की सहनुपरेको थियो । 

अब छिट्टै नेपालले भोगिरहेको केही समस्या समाधान हुने दाबी प्रचण्डले गरेका छन् । ‘डुबान, सीमा र ईपीजीको प्रतिवेदनमा सकरात्मकता आउँछ कि भन्ने लागेको छ,’ प्रचण्डले भने, ‘सम्भावना, अवसर र चुनौतीका बारेमा खुलेर कुरा भएको छ । भ्रमण फलदायी भएको छ ।’