प्रतिनिधिसभाका सभामुख अग्नि सापकोटाले प्रतिनिधिसभाका समितिमा रिक्त सभापति चयनको विषयमा राजनीतिक नेतृत्वसँग कुराकानी भइरहेको बताएका छन् । 

सिंहदरबारस्थित संसद सचिवालयमा सोमवार पत्रकारहरूसँगको अन्तरक्रियामा सभामुख सापकोटाले समिति सभापति चयनको विषयमा कुराकानी चलिरहेको जानकारी गराएका हुन् । ‘संसदीय समितिको रिक्त सभापति निर्वाचनका लागि प्रधानमन्त्रीसँग कुरा भएको छ, राजनीतिक दलका नेतृत्वसँग पनि कुराकानी भइरहेको छ’ सापकोटाले भने । 

शशी श्रेष्ठ भूमि व्यवस्था मन्त्री बनेर गएपछि राज्य व्यवस्था समिति सभापतिविहीन छ । यस्तै प्रतिनिधिसभाको लेखा समितिको सभापति आफूहरूले पाउनु पर्ने भन्दै प्रमुख प्रतिपक्षी दल नेकपा एमालेले संसदमा आवाज उठाइरहेको छ।

सार्वजनिक लेखा समितिको नेतृत्व प्रतिपक्षी दलले लिने संसदीय परम्पराविपरीत लेखा समिति कांग्रेसले राखिरहेको छ । लेखा समिति एमालेलाई दिने कि नदिने भन्ने विषयमा सहमति जुट्न नसक्दा राज्य व्यवस्था समिति सभापतिविहीन छ । लेखा समिति लिए प्रतिपक्षले सम्हालेका अन्य समिति छाड्नु पर्ने सत्ता पक्षको अडान छ । 

सभामुख सापकोटाले प्रतिनिधिसभाको यसै अधिवेशनबाट नागरिकता र संघीय निजामति विधेयक पारित गर्ने तयारी रहेको जानकारी दिए ।