परराष्ट्र मन्त्री डा. नारायण खड्काले नेपाल कुनै पनि सैन्य गठबन्धनमा सहभागी नहुने सरकारको प्रतिबद्धता दोहोर्‍याएका छन् ।

अमेरिकी राज्य साझेदारी कार्यक्रम (एसपीपी)मा सहभागी नहुने निर्णयसम्बन्धी पत्र अमेरिकालाई पठाइसकेको जानकारी गराएपछि सांसदहरूले सोधेको प्रश्नको जवाफ दिने क्रममा खड्काले सो प्रतिबद्धता दोहोर्‍याएका हुन् ।

‘कुनै पनि सैन्य गठबन्धन नेपालको हितमा छैन । अहिलेको यो गठबन्धन सरकार कुनै सैन्य वा सामरिक गठबन्धनमा सहभागी नहुने प्रतिबद्धता व्यक्त गर्न चाहन्छु,’ खड्काले भने ।

सांसदहरूले एसपीपी सम्बन्धमा अमेरिकालाई पठाएको पत्र नै सार्वजनिक गर्न माग गरेपछि खड्काले सरकारप्रति विश्वास गर्न आग्रह गरे ।

‘सरकारका तर्फबाट परराष्ट्र मन्त्री बोलिसकेपछि विश्वास गर्नुपर्छ,’ खड्काले भने, ‘विश्वास ह्रासोन्मुख भइरहेको हो कि, यसले भोलि राज्य सञ्चालनका विषयमा कस्तो असर पर्छ भन्ने पनि विचार गर्नुपर्छ ।’

यसअघि सदनमा विशेष समय लिएर बोल्दै परराष्ट्रमन्त्री खड्काले एसपीपीमा सहभागी नहुने निर्णयको लिखित जानकारी साउन ९ गते अमेरिकालाई गराएको बताएका थिए ।

पढ्नुहोस्, यो पनि :

संसदमा सरकारको जवाफ– एसपीपीमा सहभागी नहुने निर्णयको लिखित जानकारी अमेरिकालाई गराइसक्यौं

उनले नेपाली सेनाका प्रधानसेनापति प्रभुराम शर्माको अस्ट्रेलिया भ्रमणका विषयमा पनि संक्षिप्त प्रतिक्रिया दिए ।

‘अमेरिकाले पहिला एसिया प्यासिफिक कमान्ड भन्थ्यो, पछि ट्रम्पले ‘इन्डो प्यासिफिक’ स्ट्राटेजी ल्याए,’ खड्काले भने, ‘प्रधान सेनापति एसिया प्यासिफिक रिजनका आर्मी चिफहरूको सम्मेलनमा जानुभएको छ, भन्ने मैले बुझेको छु । यो रक्षा मन्त्रालयअन्तर्गतको विषय भएकाले मैले यति मात्र भन्न सक्छु ।’

उनले यस्ता भ्रमण केपी शर्मा ओली नेतृत्वको पूर्ववर्ती सरकारका पालामा पनि भएको दाबी गरे ।