नेकपा एमालेका सांसद यज्ञराज सुनुवारले नेपाली कांग्रेसको विद्यार्थी संगठन (नेविसंघ) को नाम परिवर्तन गरी विविसंघ अर्थात विश्वविद्यालय बिगार्ने संघ राख्नुपर्ने टिप्पणी गरेका छन् । 

मंगलवार प्रतिनिधि सभाको बैठकमा बोल्दै उनले नेपाल विद्यार्थी संघको नाम परिवर्तन गरी विश्वविद्यालय बिगार्ने संघ राख्न आग्रह गरेका हुन् । उनले नेविसंघकै कारण अहिले त्रिभुवन विश्वविद्यालयको दूर्दशा भइरहेको भन्दै शिक्षा ग्रहण गर्ने ठाउँमा हरेक समय तालाबन्दी भइरहनु राम्रो नभएको बताए । उनले तालाबन्दी नेविसंघको पहलमा भइरहेको आरोप लगाउँदै साउन १३ गतेबाट विश्वविद्यालय पुनः अस्तव्यस्त बनेको बताए । 

‘प्राध्यापक, सहप्राध्यापकको र कर्मचारीहरूको मौखिक परीक्षा लिने बेलामा साउन १३ गतेबाट फेरि त्रिभुवन विश्वविद्यालय अस्तव्यस्तको दिशामा अघि बढेको छ’, उनले भने, ‘यो तालाबन्दी सत्तारुढ पार्टीको त्यसमा पनि प्रधानमन्त्रीको पार्टी, त्यसको भ्रातृ संगठन नेपाल विद्यार्थी संघबाट भएको छ । नेपाल विद्यार्थी संघको नाम अब परिवर्तन गरेर वि.वि.संघ अर्थात् विश्वविद्यालय बिगार्ने संघ राख्न म प्रश्ताव गर्न चाहन्छु ।’

उनले विश्वविद्यालय अराजकताको केन्द्र बनेको पनि आरोप लगाएका छन् । ‘विश्वविद्यालयभित्र लोकतन्त्रको परिभाषा पनि चेन्ज हुन थालेको छ । विश्व विद्यालयमा बाइ द क्रिमिनल, फर द क्रिमिनल, अफ द क्रिमिनल भन्ने नारा घन्कन थालेको छ’, उनले भने, ‘१८ देखि २५ वर्षका युवा उमेरका विद्यार्थी हुनुपर्नेमा विश्वविद्यालयमा आज ४० कटेका पाका विद्यार्थीहरू थुपारेर विश्वविद्यालय अस्तव्यस्त बनाइएको छ ।’