नेकपा (एकीकृत समाजवादी) का सम्मानित नेता झलनाथ खनालले आगामी निर्वाचनमा गठबन्धनमा रहेका दलहरूबीच समान ढंगले सिट बाँडफाँट हुनुपर्ने माग गरेका छन् । कसैले अपमान महसुस गर्ने गरी सिट बाँडफाँट गरिए तालमेल हुन नसक्ने उनको भनाइ  छ । 

मंगलवार प्रधानमन्त्री शेरबहादुर देउवासँगको भेटपछि सञ्चारकर्मीहरू कुरा गर्दै नेता खनालले उचित ढंगले गठबन्धन दलबीच सिट बाँडफाँट हुनुपर्ने धारणा राखेका हुन् । पूर्वप्रधानमन्त्रीसमेत रहेका नेता खनालले प्रत्येक पार्टीलाई हैसियतअनुसार सिट दिनुपर्ने बताए । २०७४ को निर्वाचन र हालै सम्पन्न स्थानीय तहको निर्वाचनलाई मध्यनजर गरेर आगामी प्रदेश र संघको निर्वाचनमा सिट बाँडफाँट गर्नुपर्ने उनको भनाइ छ । 

गठबन्धनमा सहभागी दललाई अपमान गरेमा तालमेल नहुने भन्दै सबैलाई दललाई समान रुपमा सिट बाँडफाँट गर्ने बुटी खोजेर अघि बढ्नुपर्ने बताए । ‘गठबन्धनमा दलहरू जे आधारमा थपिन्छन्, त्यही आधारमा आवश्यक पर्ने ठाउँमा तालमेलको कुरा हुन्छ । तालमेल गर्दा प्रत्येक पार्टीको आफ्नो हैसियत हुन्छ । २०७४ को निर्वाचनको कुरा, भर्खरै सम्पन्न भएको स्थानीय निर्वाचनको परिणाम यी सबै आधारमा उभिएर सबैलाई समान हुने ढंगले हामीले तालमेल गर्नुपर्छ’, उनले भने, ‘कसैले अपमान फिल गरेमा उ तालमेलमा आउँदैन । सबैलाई समान हुने खालको तालमेलको बुटी बनाउन आवश्यक छ ।’ 

उनले वाम एकताको लागि सबैभन्दा ठूलो दलको पहल नरहेको भन्दै तत्काल कुनै पनि वृहत वाम एकताको सम्भावना नरहेको दाबी गरे । नेता खनालले भने, ‘वाम एकताको लागि सबैभन्दा ठूलो पार्टीले पहल गर्नुपर्ने हो, उसमा त्यो रुची मैले देखिनँ । वृहत वाम एकताको सम्भावना अहिले छैन ।’

उनी प्रधानमन्त्री देउवालाई नेपाली चियाको गुणस्तरका बारेमा भारतमा विभिन्न प्रतिवेदन पेस भइरहेकोबारे जानकारी गराउन बालुवाटार गएका थिए ।