राष्ट्रपति विद्यादेवी भण्डारीले सन्देशसहित फिर्ता गरेको नेपाल नागरिकता विधेयक २०७९ बहुमतले पारित भएको छ ।

बिहीवार साँझ प्रतिनिधि सभामा भएको मत विभाजनमा विधेयकको पक्षमा १३५ र विपक्षमा ६० मत परेको छ । बैठकमा उपस्थित संख्या १९५ रहेको थियो ।

बैठकमा उपस्थित संख्याको सामान्य बहुमतले विधेयक पारित गर्न सकिने प्रतिनिधिसभा नियमावलीको व्यवस्था छ । विधेयकको पक्षमा कांग्रेस, माओवादी लगायत सत्ता पक्षले मतदान गरेका थिए ।

नेकपा एमाले, नेमकिपा लगायतले विधेयकको विपक्षमा मतदान गरेका छन् । प्रमुख प्रतिपक्षी दल नेकपा एमालेले मत विभाजन माग गरेपछि मतदानमार्फत विधेयकलाई निर्णयार्थ पेश गरिएको हो । यसअघि प्रतिनिधि सभाको ध्वनि मतले विधेयक पारित गरिएको थियो ।

प्रतिनिधि सभाबाट जस्ताको तस्तै पारित विधेयक अब राष्टिय सभामा जानेछ । राष्ट्रिय सभाबाट पारित भई सन्देशसहित आएको विधेयक सभामुखले प्रमाणीकरण गरेर राष्टपतिलाई पठाइने छ ।