नेपाली कांग्रेसका नेता प्रदीप गिरीको पशुपति आर्यघाटमा राजकीय सम्मानका साथ अन्त्येष्टी गरिएको छ । आइतवार अपराह्न उनको पशुपति आर्यघाटमा अन्तिम संस्कार गरिएको हो । 

७५ वर्षीय गिरीको शनिवार राति साढे ९ बजे ललितपुरको नख्खुस्थित मेडिसिटी अस्पतालमा उपचारका क्रममा निधन भएको थियो । घाँटीको क्यान्सरको केहीसमय अघि उपचार गराएर भारतबाट फर्किएका गिरी एक महिनाअघि मेडिसिटीमा भर्ना भएका थिए । पछिल्लोपटक उनलाई घाँटीको क्यान्सर र निमोनियासमेत देखिएको थियो । 

शनिवार निधन भएका उनको शवलाई आइतवार बिहान कांग्रेस मुख्यालय सानेपामा श्रद्धान्जलीका लागि राखिएको थियो । नेपाल सरकारमा मन्त्रीहरूसहित विभिन्न दलका शीर्ष नेताहरूले सानेपा पुगेर गिरीलाई श्रद्धान्जली दिएका थिए । प्रधानमन्त्री शेरबहादुर देउवा, गृहमन्त्री बालकृष्ण खाण, सिँचाइमन्त्री पम्फा भुसाल, सभामुख अग्निप्रसाद सापकोटा, नेकपा माओवादी केन्द्रका अध्यक्ष प्रचण्ड, नेकपा समाजवादीका अध्यक्ष माधवकुमार नेपाल, नेपाल समाजवादीका अध्यक्ष बाबुराम भट्टराई, नेकपा एमालेका उपाध्यक्ष सुवास नेम्वाङलगायतका नेताहरू सानेपा पुगेका थिए । 

नेकपा एमालेका अध्यक्ष केपी शर्मा ओली नेता गिरीलाई श्रद्धाञ्जली दिन पशुपति आर्यघाट मै पुगेका थिए ।