नेकपा एमालेले चारवटा विषयलाई आधार मानेर आसन्न निर्वाचनमा उम्मेदवार छनोट गर्ने भएको छ । शुक्रवार बस्ने केन्द्रीय कमिटी बैठकले उम्मेदवार छनोटको मापदण्ड पारित गर्ने तयारी भएको छ । 

बिहीवार बसेको पोलिटब्युरो बैठकमा उम्मेदवार छनोटका मापदण्डबारे छलफल भएको थियो । पार्टी प्रचार विभाग प्रमुख पृथ्वीसुब्बा गुरुङले चारवटा मापदण्डका आधारमा उम्मेदवार छनोट गरिने जानकारी दिए । 

एमालेले तय गरेको मापदण्डमा पार्टीको नीति र कार्यक्रमप्रतिको प्रतिबद्धतालाई पहिलो आधार मानिएको छ । यस्तै आन्दोलनमा दिएको योगदान र पार्टीप्रतिको निष्ठालाई दोस्रो तथा लोकप्रियता र विजयको सुनिश्चिततालाई तेस्रो तथा महत्वपूर्ण आधार बनाइएको छ । 

संविधानअनुसार सन्तुलन र समावेशीको सिद्धान्तलाई चौथो आधार मानिने गुरुङले बताए । प्रस्तावित मापदण्डलाई केन्द्रीय कमिटीबाट अनुमोदन गरिने छ । प्रत्यक्ष चुनाव लड्न डराउने र पटक–पटक समानुपातिकबाट सीट सुरक्षित गर्ने प्रवृत्तिलाई निरुत्साहित गर्न समानुपातिक सांसद दोहोरिन नपाउने विषयलाई एउटा आधार बनाउन पोलिटब्युरो सदस्यहरूले माग गरेका छन् ।

बिहीवारको बैठकमा अध्यक्ष केपी शर्मा ओलीले भोलि केन्द्रीय कमिटीमा पेश गर्ने राजनीतिक प्रतिवेदनमाथि सुझाव मागेका थिए । ओलीले मौखिक मन्तव्य राख्दै राजनीतिक प्रतिवेदनमा समेट्नु पर्ने विषय माग गरेका थिए । 
शुक्रवार र शनिवार बस्ने केन्द्रीय कमिटी बैठकले चुनावी रणनीति र उम्मेदवार छनोटको मापदण्ड तय गर्नेछ ।