भारतको दिल्लीमा मुख्यमन्त्री अरविन्द केजरीवाल नेतृत्वको सरकारले ल्याएको नयाँ रक्सी नीति रद्द भएको छ ।

सरकारीस्तरबाटै हुँदै आएको रक्सीको बिक्रीवितरण निजी क्षेत्रलाई दिने गरी केजरीवाल सरकारले नयाँ नीति ल्याएको थियो । तर त्यो नीति विवादमा परेको छ ।

रक्सी नीतिमा उपमुख्यमन्त्री मनीष सिसोदियाले गडबडी गरेको भन्दै सीबीआईले छानबिन गरिरहेको छ । नयाँ रक्सी नीति रद्द भएसँगै अब सरकारले नै मदिरा बेच्ने भारतीय सञ्चारमाध्यमले जनाएका छन् ।

दिल्ली सरकारले राजस्व बढ्ने भन्दै नयाँ नीति लागू गरेपनि राजस्व घटेको थियो । राजस्वमा घाटा लागेपछि नयाँ नीति विवादित बनेको हो । दिल्लीका मुख्यसचिव नरेश कुमारले नयाँ नीतिमा गडबडी देखिएको भन्दै उपमुख्यमन्त्री सिसोदियामाथि छानबिन गर्न आग्रह गरेका थिए । पुरानो रक्सी नीति अब ६ महिनासम्म लागू हुनेछ । तबसम्म सरकारले अर्काे व्यवस्था मिलाउनुपर्नेछ ।