उम्मेदवारी मनोनयनसँगै सांसदको पद जाने गरी कानून संशोधन गरौँ– गगन थापा

नेपाली कांग्रेसका महामन्त्री गगन थापाले उम्मेदवारी मनोनयनको दिनबाट प्रतिनिधि सभाको कार्यकाल सकिने व्यवस्थासहित कानून संशोधन गर्न सरकारको ध्यानाकर्षण गराएका छन् । नयाँ संसदको कार्यकाल मतपरिणाम सार्वजनिक भएको दिनदेखि राख्न उपयुक्त हुने उनले बताए । 

प्रतिनिधि सभा बैठकमा मंगलवार केही नेपाल ऐन संशोधन गर्ने विधेयकमाथि संशोधन राख्दै महामन्त्री थापाले प्रतिनिधि सभाको कार्यकाल उम्मेदवारी मनोनयनको दिनसम्म मात्र रहनुपर्ने बताएका हुन् । उनले सरकारले गलत समयमा विधेयक ल्याएकोले विवाद भएको बताए । 

‘प्रतिनिधि सभाको कार्यकालबारे स्थानीय निर्वाचनभन्दा अगाडि शान्त अवस्थामा छलफल गरेको भए भिन्न अवस्था बन्थ्यो’, थापाले भने, ‘अहिले बाहिर दुई महिनाको पारिश्रमिक र सेवा सुविधाका लागि सांसदहरूले मरिहत्ते गरेजस्तोे बुझाइ छ ।’

एउटा संसदबाट अर्को संसदमा जाँदा बीचको ट्रान्जिसनमा दुर्घटना हुन्छ होला भनेर सरकारले विधेयक ल्याएको भए पनि समय गलत भएको उनले बताए । ‘मनोनयन गर्ने समयसँगै सांसदको पद जान्छ, कार्यकालको गणना सन्दर्भमा अन्तिम मतपरिणाम सकिने गरी संशोधन गरौँ’, थापाले भने ।