नेकपा एमालेका नेता तथा सांसद भीम रावलले अछामका पहिरो पीडितको उद्धारमा हेलिकप्टर परिचालन गर्न माग गरेका छन् । 

शनिवारको संसद् बैठकमा बोल्दै रावलले पहिरो पीडितका लागि लत्ता कपडा, भाडा, खाद्यन्न र औषधोपचारको व्यवस्था गर्न पनि माग गरेका छन् । 

पहिरोका कारण बाटो अवरूद्ध भएकाले स्थलमार्गबाट सुरक्षाकर्मी र स्वास्थ्यकर्मी घटनास्थलमा पुग्न सक्ने अवस्था नरहेको हुँदा पहिरो पीडितको उद्धार र व्यवस्थापनको लागि हेलिकप्टर प्रयोग गर्नुपर्ने रावलले बताए । 

समयमै उद्धारकर्मी र स्वास्थ्यकर्मी पठाउन नसके पहिरोबाट घाइते भएकाहरुलाई बचाउन कठिन हुने भएकाले पनि त्यसमा सरकारले तदारुकता देखाउनुपर्ने रावलले बताए । 

अछामको कमलबजार नगरपालिका, ढकारी र तुर्माखाद गाउँपालिकामा गएराति गएको पहिलो परी १४ जनाको मृत्यु भइसकेको छ भने ९ जना बेपत्ता रहेका छन् । पहिरोमा परी २० जना भन्दा बढी घाइते रहेको गृहमन्त्रालयमा तथ्यांक प्राप्त भएको बताइएको छ ।