सरकारले नागरिकतामा राजनीति गर्‍यो : ओली

नेकपा एमालेका अध्यक्ष तथा एमाले संसदीय दलका नेता केपी शर्मा ओलीले सरकारले नागरिकताको विषयमा राजनीति गरिरहेको टिप्पणी गरेका छन् । प्रतिनिधि सभाको अन्तिम बैठकलाई शनिवार सम्बोधन गर्दै उनले वर्तमान सरकारले नागरिकताको विषय राजनीति गर्न खोजेको बताएका हुन् । 

आफ्नो नेतृत्वको सरकारले जनतालाई नागरिकता दिनुपर्छ भनेर अध्यादेश ल्याएरै भए पनि समस्या समाधानको प्रयास गरेको दाबी ओलीले गरेका छन् । 

उनले भने, ‘नेपाली जनतालाई नागरिकता दिनुपर्छ भनेर हामीले अध्यादेश ल्याएर समस्या समाधानको प्रयास गरेका थियौँ । त्यसविरुद्ध मुद्दा हाल्न लगाएर रोक्न लगाइयो । तर, रोक्नुपर्ने कानूनी आधार थिएन ।’

जन्मसिद्ध नागरिकता पाएकाहरूको सन्तानलाई वंशजको नागरिकता दिने प्रावधान सहितको कानून बनाउनु पर्ने ओलीले बताए । 

‘जन्मसिद्ध नागरिकता पाएकाहरूको सन्तानलाई वंशजको नागरिकता दिने प्रावधान ल्याउनुस् भनेका हौँ । त्यस्तो प्रावधानसहितको विधेयक आए तत्काल पास गर्न तयार छौँ भनेका थियौँ । तर, त्यस्तो व्यवस्था नल्याएर अहिले नागरिकतामाथि राजनीति गर्न खोजिएको छ’, ओलीले भने ।  

संविधान बनेपछि भएको निर्वाचनबाट बनेको प्रतिनिधि सभाले नमूना कानून बनाउने लगायतको काम गरेको र संसद्को कार्यकाल सफल रहेको विश्लेषण पनि ओलीले सुनाए । ‘यो संसद् समग्रतामा भन्ने हो यसको कार्यकाल सफल रहेको छ । यसले संविधान कार्यान्वयनको लागि कानून निर्माण गर्ने, विकास, सामाजिक न्याय र समानताका विषयमा काम गरेको छ’, ओलीले भने । 

संसद्को कार्यकालको पछिल्लो अवधिमा एमालेविरुद्ध संसद् र संसदीय मर्यादाको वास्ता नगरेर, नियम कानूनको वास्ता नगरेर चल्ने काम भएको उनले बताए । ‘यी कामहरू लोकतन्त्रलाई, प्रणालीलाई कमजोर पार्ने, संविधानलाई कमजोर पार्ने खालका काम भए । ती कुराहरू पछिल्लो समयमा दुःखद पक्षहरू हुन् । त्यसप्रति दुःख व्यक्त गर्नुपर्छ’, ओलीले भने ।  

संसद्को पछिल्लो कार्यकालतिर तर्कहीन र स्वार्थ प्रेरित कामतर्फ संसद्लाई बलजफ्ती लतारेर लैजाने काम भएको ओलीले संसद्मा बताए । 

‘राष्ट्रियताको पक्षधरतातर्फ संसद् उभिन सक्नुपथ्र्यो । राष्ट्रिय आवश्यकता एकातिर तर, संसदीय अंक गणित निर्माण भएको थियो र त्यसलाई भत्काउने प्रयास गरियो र कृत्रिम अंक गणित बनाउने प्रयास गरियो’, उनले संसद्मा भने ।

आफूले संसद् विघटन गरेर चुनावमा जाने घोषणा गर्नुको बचाउ गर्दै ओलीले भने, ‘जनताको जनादेशलाई निस्प्रभावी पारेपछि ताजा जनादेशमा जानुको विकल्प थिएन ।’

ओलीले आगामी चुनावमा सत्ता र शक्तिको दुरुपयोग नगर्न पनि खबरदारी गरेका छन् । ‘गएको स्थानीय तहको निर्वाचनमा सत्ताको अनेक प्रकारले दुरुपयोग गर्ने काम भयो । राज्य संयन्त्रको विभिन्न कारणले दुरुपयोग गर्ने काम भयो । लोकतन्त्रमा त्यस्ता कुरा पर्दैनन् । लोकतान्त्रिक प्रणाली भनेको भिन्न मतको अस्तित्व स्वीकार्ने, प्रतिस्पर्धा गर्न तयार हुने र प्रतिस्पर्धा गर्न दिने व्यवस्था हो । निर्वाचन आयोग सत्ता पक्षबाट लतारिएर नचलोस्’, ओलीले भने । 

निर्वाचन आयोगलाई निर्वाचन गर्न सहयोग पु¥याउने सकारको भएको र सरकारले हस्तक्षेप गर्न नमिल्ने ओलीले बताए ।