धर्मेन्द्र बास्तोला नेतृत्वको नेकपा (बहुमत)ले आगामी मंसिरमा हुने चुनावलाई अवज्ञा गर्ने घोषणा गरेको छ । शनिबार राजधानीको संवाद डबलीमा पत्रकार सम्मेलन गरी संयोजक बास्तोलाले यस्तो घोषणा गरेका हुन् । 
तेस्रो केन्द्रीय समिति बैठकका निर्णयहरु सार्वजनिक कार्यक्रममा बोल्दै संयोजक बास्तोलाले  संसदीय चुनाव विगतदेखि वर्तमानसम्म जनताको निम्ति भन्दा निजी स्वार्थका निम्ति राष्ट्रघात गर्ने माध्यम भएकाले त्यसलाई अवज्ञा गर्नुको विकल्प नरहेको बताए ।

आफूहरुले निरपेक्षित रुपमा चुनाव अवज्ञा वा वहिस्कार र संघर्ष मात्रै नरोजेर त्यसको निकासका लागि तत्काल स्वाधीन संयुक्त सरकारको विकल्पसहित अगाडी बढेको जिकिर गरेका छन् ।
बहिस्कार नभनेर ‘अवज्ञा’ शब्दको प्रयोग गर्नुभयो, सशक्त,सशस्त्र वा शान्तिपूर्ण कस्तो हुन्छ ? भन्ने प्रश्नको जवाफ दिँदै बास्तोलाले विगतको जस्तो हिंसात्मक नहुने बताउँदै भने,“वहिस्कार भन्ने वित्तिकै बम विष्फोट, हातहतियारको प्रयोग, कुनै पनि किसिमको हिंसात्मक नभई शान्तिपूर्ण जनचेतनामूलक कार्यक्रम सहित अवज्ञाका लागि जनतामाझ जानेछौँ ।