प्रमुख निर्वाचन आयुक्त दिनेशकुमार थपलियाले राजनीतिक दलले पेश गरेको समानुपातिक तर्फको बन्दसूची रुजु गरेर दर्ताको काम आज रातभरि चल्न सक्ने बताएका छन् । मंसिर ४ गते हुने प्रतिनिधि सभा र प्रदेश सभा निर्वाचनका लागि समानुपातिक तर्फको बन्दसूची बुझाउने आज (सोमवार) अन्तिम दिन हो । 

आयोग परिसरमा पत्रकारहरूसँग कुरा गर्दै थपलियाले आज ५ बजेसम्म आयोगभित्र पसेका दलले बन्दसूची बुझाउन सक्ने बताएका हुन् । प्रतिनिधि सभा निर्वाचनमा सहभागी हुन आवेदन दिएका ८७ मध्ये एक दर्जन दलले मात्र सोमवार दिउँसोसम्म सूची बुझाएका छन् ।

नेपाली कांग्रेस, नेकपा एमालेलगायतका ठूला दल आयोग पुगेका छैनन् । स्थानीय तह निर्वाचनको मनोनयनको अवस्था हेर्दा बन्दसूची बुझाउने काम रातभरि चल्ने संकेत देखिएको उनले बताए । 

‘भोलि बिहानसम्म भए पनि त्यसलाई आजै मानिन्छ । हाम्रो स्रोत साधनले भ्याएसम्म चाँडो गर्ने कोसिस गर्छौँ’ थपलियाले भने । बन्दसूचीमा रहेका उम्मेदवारको मतदाता नामावलीलगायत रुजु गर्नुपर्ने भएकोले बन्दसूची बुझाउने प्रक्रिया लम्बिएको हो ।