पार्टीभित्र न्याय र समान अवसरको लागि संघर्ष गरिरहेका नेपाली कांग्रेसका विद्रोही समूहले बिहीवार चियापान समारोह आयोजना गरेको छ । बत्तिसपुतलीस्थित एक पार्टी प्यालेसमा चियापान कार्यक्रम आयोजना गरिएको हाे । 

चियापान कार्यक्रम ‘पार्टीको आन्तरिक एकता, समान अवसर र न्यायका निम्ति’ पनि भएको आयोजक नेपाली कांग्रेस खबरदारी अभियानले जनाएको छ । कार्यक्रममा डा. शेखर कोइरालासहित उक्त समूहमा रहेका पदाधिकारी तथा पूर्वपदाधिकारी सहभागी भएका छन् । 

समान अवसर र न्यायका लागि खबरदारी अभियानमा सहभागी नभएका नेता शेखर कोइराला, उपसभापति धनराज गुरुङ, महामन्त्री गगन थापा, नेता चन्द्र भण्डारी, सञ्जय गौतम लगायत सहभागी छन् । बुधवार दिउँसो  नेता कोइराला, महामन्त्री थापा र सह–महामन्त्री बद्री पाण्डेले खबरदारी अभियानको नेतृत्व गरिरहेका नेता गुरुराज घिमिरे, जगदीश्वरनरसिंह केसी, भुपेन्द्रजंग शाहीलगायसँग भेटवार्ता गरेका थिए । उक्त समूहले यसअघि आयोजना गरेको खबरदारी सभा, धर्नालगायतका कार्यक्रममा भने पदाधिकारीहरू सहभागी हुने गरेका थिएनन् । 

प्रधानमन्त्रीसमेत रहेका पार्टी सभापति शेरबहादुर देउवाको एकलौटीविरुद्ध कोइराला समूहले बुधवार पार्टीको केन्द्रीय कार्यालय सानेपामा धर्ना दिएको थियो ।

आसन्न प्रतिनिधि सभा निर्वाचनको समानुपातिक सूची एक पक्षीय रूपमा निर्वाचन आयोगमा पेश गरेको भन्दै कांग्रेसको कोइराला पक्ष आन्दोलित छ । उनीहरूले आयोगमा बुझाइएको समानुपातिक उम्मेदवारको बन्दसूची सच्याउनु पर्ने र प्रत्यक्षतर्फ आफूहरूको समूहलाई ४० प्रतिशत हिस्सा दिनुपर्ने माग गरिरहेका छन् । पार्टी सभापति शेरबहादुर देउवाले एकलौटी ढंगले निर्णय गरेको भन्दै शेखर समूह असन्तुष्ट छ ।