नेकपा एमाले र जनता समाजवादी पार्टी (जसपा)बीच चुनावी तालमेलको लागि तारन्तार छलफल भइरहेका छन् । पाँच दलीय गठबन्धनबाट बाहिरिने निर्णय गरेको जसपाका नेताहरूले चुनावी तालमेलको लागि एमालेका शीर्ष नेताहरूलाई पालैपालो भेटवार्ता गरिरहेका छन् । 

शनिवार दिउँसो सिंहदरबारस्थित जसपाको संसदीय दलको कार्यालयमा कार्यकारिणी समितिको बैठक बसेर गठबन्धनबाट बाहिरिने निर्णय गरेलगत्तै जसपाका नेताहरू एमालेका नेताहरूको सम्पर्कमा पुगेका थिए ।

एमाले अध्यक्ष केपी शर्मा ओली शनिवार विराटनगर पुगेर काठमाडौं फर्किएलगत्तै राति ओली र जसपाका अध्यक्ष उपेन्द्र यादवका बीच करिब दुई घण्टा संवाद भएको एमाले नेताहरूले बताएका छन् । 

सत्तारूढ पाँच दलीय गठबन्धनमा सिट बाँडफाँटमा असन्तुष्ट जसपालाई एमालेले प्रतिनिधि सभामा २० देखि २५ सिट र प्रदेशमा सोही अनुपातमा सिट दिने आश्वासन दिएपछि जसपाले यू–टर्न लिएको थियो ।

एमाले अध्यक्ष केपी शर्मा ओलीलाई ‘प्रतिगामी’ बिल्ला भिराएर पाँच दलीय गठबन्धनमा सहभागी भएको जसपा अन्ततः एमालेसँग चुनावी तालमेलमा आउने अन्तिम प्रयास गरिरहेको छ । 

एमाले अध्यक्ष केपी शर्मा ओलीसँगको शनिवार रातिको भेट सकरात्मक भएपछि जसपा अध्यक्ष उपेन्द्र यादव र एमालेका महासचिव शंकर पोखरेलले आइतवार दिउँसो भेटवार्ता गरेका छन् । उनीहरूबीच भेटवार्ता भएको स्थान भने गोप्य राखिएको छ । 

‘एमाले र जसपा चुनावी तालमेलको गम्भीर छलफलमा छन् । आज वा भोलिसम्म निर्क्यौल आउने सम्भावना छ’, एमालेका उच्च तहका एक नेताले भने, ‘जसपालाई गठबन्धनमा भन्दा बढी सिट दिन सक्ने एमालेले नै हो । एमाले र जसपाको चुनावी तालमेल अगाडि बढ्यो भनेर बुझ्दा हुन्छ ।’

यसअघि एमालेले महन्थ ठाकुर नेतृत्वको लोकतान्त्रिक समाजवादी पार्टी (लोसपा)सँग चुनावी तालमेलको लागि संवाद गरेको थियो । तर, दुई पार्टीबीचको चुनावी तालमेलमा ठोस प्रगति हुन सकेको थिएन ।

लोसपासँग चुनावी तालमेलको छलफलले सार्थकता नपाइरहेको र गठबन्धनमा जसपा असन्तुष्ट रहेको थाहा पाएका एमाले नेताहरूले गठबन्धनमा पाउनेभन्दा बढी सिट दिने प्रस्ताव जसपाका नेताहरूलाई गरेका थिए ।

पाँच दलीय गठबन्धनमा जसपाले प्रतिनिधि सभामा करिब १५ सिट मात्रै पाउने भएपछि जसपा बिच्किएको थियो । 

जसपा अध्यक्ष उपेन्द्र यादव आगामी चुनावपछि पनि मधेश प्रदेशमा जसपाकै नेतृत्वमा सरकार बनाउन चाहन्छन् । मधेश प्रदेश सभामा प्रत्यक्षतर्फ ६४ सिट छ । मधेश प्रदेशमा बहुमत नभए पनि प्रदेशको ठूलो पार्टी बनेर सरकारको नेतृत्व गर्नका लागि उनी अहिल्यैबाट वातावरण बनाउने प्रयासमा लागेका छन् । 

पढ्नुहाेस् याे पनि

२०–२५ सिट दिने एमालेको आश्वासनपछि जनता समाजवादी पार्टीले लियो यू–टर्न