सबै निर्वाचन क्षेत्रमा मुख्य निर्वाचन अधिकृतको कार्यालय स्थापना

निर्वाचन आयोगले प्रतिनिधि सभाको १६५ वटै निर्वाचन क्षेत्रमा निर्वाचन अधिकृतको कार्यालय स्थापनाको काम सकिएको जनाएको छ । बिहीवारसम्म प्रतिनिधि सभा तर्फका १६५ वटै क्षेत्रमा निर्वाचन अधिकृतको कार्यालय स्थापना भइसकेको जनाएको आयोगले हो । 

आयोगका सह–प्रवक्ता सूर्यप्रसाद अर्यालले बिहीवारसम्म १६५ वटै प्रतिनिधि सभाका निर्वाचन क्षेत्रमा निर्वाचन अधिकृतको कार्यालयहरू स्थापना भइसकेको बताए । उनले स्थापना भएका कार्यालयहरूमा जनशक्ति र आवश्यक व्यवस्थापकीय कामहरू पनि पूरा भएको बताए । स्थापना भएका निर्वाचन अधिकृतको कार्यालयमा शुक्रवार र शनिवारको समय असोज २३ गते हुने प्रतिनिधि र प्रदेश सभाको प्रत्यक्ष तर्फको उम्मेदवारी मनोनयनका लागि तयारीको समय रहेको बताए । 

‘निर्वाचन अधिकृतको कार्यालय स्थापनाको लागि प्रारम्भमा असोज २१ गतेको मिति तोकिएको थियो । पृष्ठपोषणकै आधारमा २१ गते स्थापना गर्दा अलिकति ढिला हुन्छ, अरु व्यवस्थापन गर्न भन्ने सुझाव आएका कारण आयोगले निर्णय गरेर १५ देखि २० गतेसम्म अनुकूलता हेरेर कार्यालय स्थापना गर्ने भनेअनुसार हिजोसम्म १६५ वटै प्रतिनिधि सभाका निर्वाचन क्षेत्रमा कार्यालयहरू स्थापना भइसकेका छन् । कार्यालय स्थापना हुनुको अर्थ त्यहाँ जनशक्ति पनि कोभिड व्यवस्थापनदेखि हरेक कुराहरूको व्यवस्थापन भएको मान्नुपर्छ’, उनले भने, ‘बीचमा २१ र २२ गतेको दुई दिनको समय छ, त्यो तयारी समय पनि भयो । २३ गते मनोनयन दर्ताको समय छ । प्रशासनिक व्यवस्थापन हामीले कतिपय कुराहरू कानूनले तोकेबमोजिम नै हुन्छ । कतिपय कुराहरू निर्वाचन अधिकृतज्यूहरूको व्यक्तिगत कुशलतामा पनि भर पर्छ ।