निजी क्षेत्रको आन्तरिक उडानमा अग्रणी वायुसेवा कम्पनी बुद्ध एयर २६ वर्षमा प्रवेश गरेको छ । यो वायुसेवाले २५ वर्षअगाडि एउटा जहाजबाट शुरु गरेको हवाई उडानको यात्रा १६ वटा जहाजसम्म पुगेको छ । अझै नयाँ गन्तव्य र अवसरको खोजी भइरहेको बुद्ध एयरका प्रवन्ध निर्देशक वीरेन्द्रबहादुर बस्नेतले बताए ।

सोमवार राजधानीमा यो वायुसेवाको २५औँ वर्ष पूरा गरेको अवसरमा आयोजना गरेको पत्रकार सम्मेलनमार्फत बस्नेतले आगामी दिनमा बुद्ध एयरलाई थप विश्वसनीय बनाउन मेहनतका साथ लागिरहने बताए । उनले भने ‘रजत महोत्सवसँगै अबको यात्रा गोल्डेन तर्फको हुने छ ।’

बुद्धले निकट भविष्यमा ३ एटीआर जहाज थप गर्ने योजना सार्वजनिकसमेत गरेको छ । हाल ५६ प्रतिशत बजार हिस्सा ओगटेको यो वायुसेवाले सन् २०२१ मा मात्रै २० लाख ३२ हजार यात्रु उडाएको थियो । 

१५ सय जना कर्मचारीको मेहनतले बुद्ध एयरको शाख आजको दिनसम्म आइपुगेको र अझै बलियो उपस्थिति र बजारमा पहुँच बढाउने पनि यो वायुसेवाले बताएको छ । यसले आधुनिक प्रविधियुक्त नयाँ जहाज थप गर्दै नयाँ रूटको खोजीसमेत बढाउदै जाने भएको छ ।

आन्तरिक उडानका अरु वायुसेवासँग प्रतिस्पर्धा गर्दै यो वायुसेवाले थप उचाई लिने दाबी पनि बस्नेतको छ । महामारीले ८ महिनासम्म असहज अवस्थामा पुगेको हवाई उद्योगको पुनरुत्थान हुँदै पुनः पुरानै लयमा पुगेको छ ।

यो वायुसेवाले पोखराबाट अन्तर्राष्ट्रिय उडान गर्ने अनुकूल परिस्थितिको खोजी गरिरहेको छ । यसले दुर्गम क्षेत्रमासमेत उडान विस्तार गर्न नयाँ कम्पनीबाटै प्रक्रिया अगाडि बढाउन थालेको भए पनि अनुकूल परिस्थिति नभएसम्म अगाडि नबढ्ने पनि बताएको छ ।

दुर्गम क्षेत्र उडानका लागि जहाज महंगो भएको र लागत बढी पर्ने हुँदा उडानबाट लाभ हुने अवस्था नदेखिएपछि तत्कालका लागि भने दुर्गम उडानको योजनालाई थाति राखेको बस्नेतले बताए । उनले अवसर र सम्भावनालाई भने सधै पर्खेर बसेको पनि बताए ।