उम्मेदवारहरूको नामावली प्रकाशन गर्दै निर्वाचन आयोग

निर्वाचन आयोगले आज (मंगलवार) उम्मेदवारहरूको नामावली प्रकाशन गर्दैछ । 

आगामी मंसिर ४ गते हुने प्रतिनिधि सभा र प्रदेश सभा निर्वाचनको कार्यतालिका अनुसार आयोगले आज उम्मेदवारको नामावली प्रकाशन गर्न लागेको हो ।

आयोगले यसअघि आइतवार उम्मेदवारहरूको मनोनयन दर्ता गरेको थियो । 

यस्तै सोमवार उम्मेदवारविरुद्ध परेका उजुरी लिएको थियो । 

प्राप्त उजुरीमाथि मंगलवार छानबिन गरी निर्णय लिने र नामावली सार्वजनिक गरिने आयोगले जनाएको छ । 

आयोगले उम्मेदवारविरुद्ध परेका उजुरीमाथि छानबिन गर्ने जिम्मा भने सम्बन्धित निर्वाचन अधिकृतलाई नै दिएको छ । 

आज बेलुका ५ बजेदेखि ७ बजेसम्म उम्मेदवारको नामावली सार्वजनिक गर्ने कार्यतालिका रहेको छ  । 

कार्यतालिका अनुसार बुधवार बिहान १० बजेदेखि १ बजेसम्म उम्मेदवारले नाम फिर्ता लिने दिन तोकिएको छ । 

बुधवार नै ३ बजेभित्र उम्मेदवारको अन्तिम नामावली प्रकाशन गर्ने र ४ देखि ५ बजेभित्र उम्मेदवारलाई निर्वाचन चिह्न प्रदान गर्ने निर्वाचन कार्यतालिका छ ।