महजोडी अर्थात मदनकृष्ण श्रेष्ठ र हरिवंश आचार्यको अभिनय रहेको फिल्म ‘महापुरुष’ टिम प्रोमोशनल टुरमा निस्किएको छ । 

देशका सात सहरमा फिल्मको प्रमोशनल टुर हुँदैछ । 

२५ गते मंगलवार पूर्वी सहर बिर्तामोडदेखि फिल्मले प्रोमोशनल टुर शुरू गरेको छ । 

बुधबार (आज) इटहरी र विराटनगरमा फिल्मको प्रचारप्रसार कार्यक्रम आयोजना हुँदैछ । 

दिउँसो ३ बजेदेखि इटहरीस्थित कस्तुरी कलेज मैदान र साँझ ६ बजेदेखि विराटनगरस्थित विराटनगर सेन्ट्रल मलमा कार्यक्रम हुने निर्माण टिमले जानकारी दिएको छ ।

त्यस्तै, २७ गते हेटौंडा, २८ गते नारायणगढ, २९ गते बुटवल र ३० गते पोखरामा प्रोमोशनल टुर कार्यक्रम आयोजना हुनेछ ।

प्रोमोशनल टुरमा मदनकृष्ण श्रेष्ठ, हरिवंश आचार्यसहित फिल्मका कलाकारहरू राजाराम पौडेल, गौरी मल्ल, रविन्द्रसिंह बानियाँ, अरुण क्षेत्री, अञ्जना बराइली, कमेडियन सुमन कार्की र गायक निशान भट्टराई लगायत सहभागी छन् । 

बुधवार इटहरी र विराटनगरमा हुने कार्यक्रममा भने निशानबाहेक अन्य कलाकारहरूसँगै गायिका रचना रिमाल सहभागी हुँदैछिन् । 

प्रदीप भट्टराई लिखित एवं निर्देशित फिल्म तिहार ‘भाइटीका’को भोलिपल्ट अर्थात कात्र्तिक ११ गते प्रदर्शन हुँदैछ । 

सामाजिक कथावस्तु र कमेडी जनरामा निर्माण भएको फिल्मको निर्माता म्याक्स दिपेश खत्री हुन् भने कार्यकारी निर्मातामा रविन्द्रसिंह बानियाँ रहेका छन् ।